Kryetarja e Kuvendit, së bashku me Presidenten Justina Shiroka Pula dhe ministrin e Shëndetësisë, Arben Vitia, janë vaksinuar sot kundër gripit sezonal në Qendrën Kryesore të Mjekësisë Familjare në Prishtinë, raporton Ekonomia Online.
Me këtë rast, kryetarja e Kuvendit ka theksuar rëndësinë e vaksinimit si një mënyrë e rëndësishme për mbrojtjen e shëndetit individual dhe kolektiv, veçanërisht në prag të sezonit të gripit.
“Shëndeti ynë varet edhe nga kujdesi që tregojmë për njëri-tjetrin. Vaksinimi kërkon vetëm pak minuta, por ndihmon në uljen e rrezikut nga gripi sezonal dhe komplikimet që mund të shkaktojë, si për ne, ashtu edhe për njerëzit përreth nesh”, ka deklaruar ajo.
Ajo ka rikujtuar se me rënien e temperaturave rritet edhe përhapja e gripit, ndërsa pasojat mund të jenë më të rënda për të moshuarit dhe personat që vuajnë nga sëmundje kronike.
“Ju ftoj të vaksinoheni, sepse kujdesi për shëndetin është përgjegjësi e përbashkët. Duke u vaksinuar, kontribuojmë jo vetëm në mbrojtjen e vetes, por edhe në mbrojtjen e familjarëve dhe gjithë komunitetit”, ka theksuar kryetarja e Kuvendit.
Në fund, ajo ka falënderuar personelin shëndetësor të Qendrës Kryesore të Mjekësisë Familjare në Prishtinë për mikpritjen dhe angazhimin e vazhdueshëm në shërbim të shëndetit të qytetarëve.
Vaksinimi kundër gripit sezonal mbetet një nga masat parandaluese për të zvogëluar rrezikun e infektimit dhe të komplikimeve, veçanërisht te kategoritë më të ndjeshme të popullsisë.
