Përktheu dhe përshtati në shqip: Psikoterapeut Yll Avdijaj
“Për të gjetur të Dashurin, duhet të bëhesh i Dashur.”
– RUMI.
Modeli i rrotës me ngjyra të dashurisë:
Në librin e tij të vitit 1973, Ngjyrat e dashurisë, psikologu John Lee krahasoi stilet e dashurisë me rrotën e ngjyrave. Ashtu si ka tre ngjyra kryesore, Lee sugjeroi se ekzistojnë tre stile kryesore të dashurisë:
1. Eros: Termi Eros rrjedh nga fjala greke që do të thotë “pasionant” ose “erotik”. Lee sugjeroi që ky lloj dashurie përfshin si pasionin fizik ashtu edhe emocional. Ai përfaqëson dashurinë për një person ideal.
2. Ludus: Ludus vjen nga fjala greke që do të thotë “lojë”. Kjo formë dashurie është konceptuar si lozonjare dhe argëtuese, por jo domosdoshmërisht serioze. Ata që shfaqin këtë formë dashurie nuk janë gati për angazhim dhe janë të kujdesshëm ndaj intimitetit të tepërt. Pra, ajo përfaqëson dashurinë si një lojë.
3. Storge: Storge rrjedh nga termi grek që do të thotë “dashuri natyrore”. Kjo formë dashurie përfshin dashurinë familjare midis prindërve dhe fëmijëve, vëllezërve e motrave dhe anëtarëve të familjes së gjerë. Kjo dashuri mund të zhvillohet edhe nga miqësia, ku njerëzit që ndajnë interesa dhe angazhime gradualisht zhvillojnë dashuri për njëri-tjetrin. Prandaj, ajo përfaqëson dashurinë si miqësi.
