Një studim i ri ka zbuluar se një erëz që shumë njerëz e përdorin në kuzhinë mund të ndërhyjë në mënyrën se si trupi përpunon ilaçet
Shkencëtarët në Universitetin e Misisipit kanë vërejtur se cinnamaldehida, përbërësi kryesor i kanellës, mund të aktivizojë receptorët që përshpejtojnë zbërthimin e disa ilaçeve, duke ulur kështu efektivitetin e tyre. Ndërsa një sasi e vogël kanellë në kafenë e mëngjesit nuk paraqet problem, studimi paralajmëron se dozat e larta mund të jenë të rrezikshme.
“Probleme shëndetësore mund të ndodhin nëse konsumohen suplemente në sasi të tepërta pa njohuri dhe pa këshillën e një profesionisti shëndetësor ose mjeku që përshkroi ilaçin. Konsumi i tepruar i suplementeve mund të shkaktojë nxjerrje më të shpejtë të ilaçeve nga trupi, duke ulur efektivitetin e tyre,” tha Shabana Khan, shkencëtarja kryesore e studimit.
Sipas studiuesve, vaji i kanellës nuk paraqet rreziqe të mëdha, por lëvorja e kanellës mund të shkaktojë probleme, veçanërisht një lloj më i lirë i saj, i njohur si kanella Cassia, e cila përmban kumarinën, një agjent hollues të gjakut, raporton New York Post.
“Kanella e vërtetë e Sri Lankës ka përmbajtje më të ulët kumarine dhe mbart më pak rrezik. Këshilla jonë kryesore është të konsultoheni me një profesionist shëndetësor para përdorimit të suplementeve bashkë me ilaçe me recetë. Shtesat dietike nuk janë të destinuara për trajtimin apo shërimin e sëmundjeve,” tha Amar Chitibojina, zëvendësdrejtor i Qendrës Kombëtare për Kërkime të Produkteve Natyrore dhe bashkautor i studimit.
Kanella e bluar që gjendet në shumicën e supermarketeve zakonisht vjen nga lëvorja e kanellës Cassia, prandaj rëndësia e konsultimit me mjekun në rast të përdorimit të sasive të larta të kësaj erëze është e domosdoshme.
Kanella është vlerësuar prej kohësh për përfitimet e saj të mundshme shëndetësore, si rregullimi i nivelit të sheqerit në gjak dhe vetitë anti-inflamatore, të cilat mund të ndihmojnë në parandalimin e diabetit. Megjithatë, hulumtimet e reja nxjerrin në pah rëndësinë e konsumit të moderuar.
“Njerëzit me sëmundje kronike si hipertensioni, diabeti, kanceri, artriti, astma, obeziteti, HIV, AIDS apo depresioni duhet të jenë të kujdesshëm kur përdorin kanellë ose ndonjë suplement tjetër,” tha Khan.
