Pacientët shpenzojnë miliona euro jashtë Kosovës për trajtim, derisa mjekët dhe infermierët po ikin nga Kosova për të punuar jashtë vendit.
Sektori i shëndetësisë është shumë i rëndësishëm, dhe profesionistët e kësaj fushe thonë se ky do të ishte prioritet për Qeverinë e re.
Reformat në sistemin shëndetësor, me gjithë lëvizjet e bëra ndër vite, vlerësohet se nuk arritën që të zbatohen në masë të kënaqshme.
Kryetari i Federatës Sindikale të Shëndetësisë, Blerim Syla tha për “Radion Evropa e Lirë” se ministri i ardhshëm i Shëndetësisë do duhej ta bindë Qeverinë e Kosovës se sektori i shëndetësisë duhet të jetë prioritet, për shumë arsye, përcjell albinfo.ch.
Ndërkohë, Basri Lenjani drejtor i Klinikës Emergjente në Qendrën Klinike Universitare të Kosovës thotë se që nga koha e pas luftës, asnjëra nga qeveritë nuk e ka pasur prioritet shëndetësinë.
Si rezultat, pacientët shpenzojnë miliona euro jashtë Kosovës për trajtim, derisa mjekët dhe infermierët po ikin nga Kosova për të punuar jashtë vendit.
Ai pret që Qeveria e re të përfundojë dy projekte të rëndësishme, ndërtimin e ndërtesës së emergjencës së re dhe njësitin e helikopterëve.
Krahas problemeve tjera, sistemi shëndetësor vazhdon të përballet edhe me mungesa në listën e barnave esenciale, me cilësinë e dobët të shërbimeve shëndetësore dhe me kushte jo të mira brenda institucioneve të shëndetit publik.
