Intervistë me autoren: Ildije Xhemali
Intervistoi për Gazetën Frymëzimi: Ferdane Sahiti
F.Sahiti: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
I.Xhemali: Profesioni që zgjodha në jetë mësuese më dha mundësinë të arsimohen në Pedagogjike si shkollë e mesme dhe më vonë të studioj për Gjihë-letërsi më shtroi udhën dhe m’i lehtësoi përpjekjet për të marrë një kulturë të kënaqshme për letërsinë. Për 40 vjet punova mësuese e këtyre lëndëve në sistemin arsimor 9- vjeçar, fshat dhe qytet.
E kam filluar me poezi se poezia është shpërthim i menjëhershëm i ndjenjave që përjeton njeriu. Dalëngadalë kam kaluar edhe tek proza që ka edhe hapësira më të mëdha dhe mesazhet i jep më të qarta. Kam shkruar tregime të shkurtra dhe të gjata me tema nga më të ndryshmet. Gjatë viteve të punës kam shkruar dhe i kam grumbulluar krijimet e mia. Në vitet e pensionit krijimet e grumbulluara fillova t’i botoj dhe vazhdova të shkruaj.
F.Sahiti: A mendoni që e keni arritur kulmin e karrierës suaj?
I.Xhemali: Asnjëherë krijimet e mia dhe librat e botuara nuk i kam parë si arritje në karrierë, por kanë qenë ngarkesë shpirtërore që jam qetësuar duke I derdhur në krijimet e mia .Temat që kam trajtuar janë nga më të ndryshme: atdhetare, shoqërore, familjare.
Kanë karakter edhe edukues, sepse puna ime si mësuese ma ka diktuar këtë drejtim. Një nga temat më të dashura të krijimeve të mia janë: për Kosovën, Çamërinë, Kombin tonë.
F.Sahiti: A kujtoni ndonjë kohë kur mendoni se keni dështuar në këtë fushë?
I.Xhemali: Dështim nuk do ta quaja asnjë kohë, por pauzë për rrethana të caktuara po. Nëse në një moment do kisha dështuar do të kisha hequr dorë përfundimisht, sepse dështimi do të tregojë që nuk i përket letërsisë.
F.Sahiti: Sa e keni pas të vështirë dhe sfiduese të jeni këtu ku jeni sot?
I.Xhemali: E vështirë ka qenë por sot falë rrjeteve sociale ndjek me dashuri krijimet e vëllezërve tanë të Kosovës dhe ata të miat. Kemi lehtësime në përgjithësi për ata që donë të arrijnë.
Një merak kam. Të rinjtë shqiptarë kosovarë, të rinjtë shqiptarë që jetojnë në shtetin amë ta kuptojnë më shpejt, më mirë njëri-tjetrin. Moshatarët e mi, në të dy krahët e kufirit, nuk e kuptojnë mirë njëri- tjetrin. Kjo më shkakton dhimbje. Sado që të arrijmë po mbesim borxh ndaj njëri-tjetrit.
F.Sahiti: Si e shihni Shqipërinë pas 10 vitesh në fushën e letërsisë?
I.Xhemali: Lexuesi i çdo moshe do ta ketë më të lehtë të përthithi bukuritë e një vepre letrare të botuar nga çdo krijues shqiptar pavarësisht ku ka lindur dhe ku është arsimuar, në çdo troje të Kombit tonë.
