Kryetarja e Komisionit për negocimin e teksteve shkollore, Merita Januzaj është intervistuar për rreth dy orë në Komisionin Hetimor Parlamentar për procesin e subvencionimit të blerjes së teksteve shkollore dhe mjeteve mësimore, raporton Ekonomia Online.
Jonuzaj ka thënë se kanë arritur ta zbresin çmimin e teksteve shkollore nga 5 milionë e 800 në 4 milionë e 800 mijë.
“Si zyrtare ministrisë sa herë është kërkuar një informatë ne iu kemi përgjigje pozitivisht kërkesave të Kuvendit. Është një proces si hallkë e ndërmjetme e procesit të teksteve shkollore. Pasi përzgjidhen tekstet shkollore vlerësohet tekstet atëherë departamenti i caktuar bënë kërkesën dhe hapet tenderi. Detyra jonë është me kërku me ulë çmimin me aq sa mundet. Kemi pasur takime me shtëpitë botuese për të ulur sa më shumë çmimin. Çmimi ka qenë 4 milionë e 300 mijë kurse oferta në shtëpitë botuese ka qenë rreth 5 milionë. Jemi munduar me ulë ofertat dhe kemi ulur diku mbi 1 milion ofertën totale të shtëpive botuese. Prej 5 milionë e 800 mijë kemi përfunduar në 4 milionë e 800 mijë euro. Shtëpitë botuese nuk kanë dashur më zbrit fare çmimin. Tekstet e abetares, gjuhës boshnjake, turke, tekstet e diasporës kanë rritur më shumë çmimet e teksteve”, tha Januzaj.
Kryesuesi i këtij Komisioni, Shemsedin Dreshaj ka pyetur Januzaj se sa kanë ulur saktë çmimin secila shtëpi botuese.
Ajo ka deklaruar se afro 1 milionë ka zbritje të çmimeve në shtëpinë botuese “Dukagjini”.
“Në total ‘Dukagjini’ prej 4 milionë e 260 mijë euro ka zbrit rreth 3 milionë e 459 mijë euro, ‘Albasi’ ka pasur 1 milion e 400 mijë dhe ka zbritur 1 milion e 200 mijë euro, ‘Berati’ prej 50 mijë ka zbrit në 42 mijë euro, edhe tekstet e minoriteteve ishin pjesë e negocimit dhe ato e kanë rritur vlerën e çmimit. Pas negocimit kur e ka dorëzuar raportin nuk ka ndonjë përgjegjësi tjetër se nuk është më në rolin tonë”, tha Januzaj.
Por deputeti i Partisë Demokratike të Kosovës, Ardian Kastrati, pati vërejtje rreth metodës së subvencionimit. Sipas tij, kontrata është prishur për shumën prej mbi 500 mijë euro, ndërsa kanë arritur ta përdorin metodën e subvencionimit që shkon mbi 11 milionë euro. Për këtë, ftoi Prokurorinë për hetim.
“Është era korrupsion dhe këtu ka punë Prokuroria. Për 514 mijë euro e prishin negociatën në shtëpitë botuese dhe shkojnë në metodën e subvencionimit me 11 milionë e 617 mijë euro. Për miliona më shtrenjtë që nuk arsyetohen në asnjë mënyrë as nga Nagavci e as nga dëshmitarët e tjerë në lidhje më këtë çështje. Sipas ekspertes së Prokurimit, kuptimi i negociatave është në kompromis të blerësit dhe ofertuesit që do të thotë që në këtë rast shumë më mirë do të ishte për 514 mijë euro të rivendoset vija buxhetore dhe të vazhdohet me metodën e vjetër të subvencionimit, dhe nxënësit të marrin librat me një shtator siç i kanë marrë gjithmonë para vitet paraprake”, tha Kastrati.
“Sipas dosjes së tenderit janë planifikuar 4 milionë 316 mijë euro për tekstet shkollore nga të cilat ju e thatë që shtëpitë botuese kanë ofruar 5 milionë 882 mijë euro. Kjo praktikë është e zakonshme gjithmonë ka qenë e zakonshme sa e di unë. Shtëpitë botuese gjithmonë kanë ofertuar më lartë sesa që është, më pastaj është negociuar nga ana juaj. Ju keni bërë një punë të jashtëzakonshme, po ashtu edhe shtëpitë botuese kanë zbrite në mënyrë të jashtëzakonshme sa po e shoh në raportin tuaj maksimum në vlerë. Dhe tash nga vlerat që janë ofruar për tekstet shkollore në vitin e kaluar MAShTI, 4 milionë e 316 mijë ju e keni zbrit në 1 milion më pak shtëpitë botuese për 514 mijë euro është vendosur që të shkoj në metodën e re të subvencionimit, e cila sipas Arbërie Nagavci ishte 11 milionë euro”, u shpreh Kastrati.
