Intervistë me autorin: Albin Mehmeti
Intervistoi për Gazetën Frymëzimi: Fatijona Bajraj
Albin Mehmeti lindi më 26 prill të vitit 1992 në qytetin e Skenderajt, aty ku përfundoi shkollimin fillor dhe të mesëm. Studimet universitare dhe pasuniversitare për letërsi i përfundoi në Universitetin e Prishtinës “Hasan Prishtina”. Albin Mehmetin e shohim të pranishëm në revista dhe festivale të ndryshme të letërsisë në Kosovë dhe jashtë saj. Deri më tani ka botuar dy libra me tregime “Telegrami dhe tregime të tjerë” dhe “Hipnoza”.
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi?
A.Mehmeti: Me letërsi (e që fillimet e mia më shumë ishin të orientuara kah poezia) fillova të mrrem si gjimnazist, aty ku hodha hapat e parë në letërsi. Më pas, vendosa që të thellohem edhe më shumë në botën letrare, ku fillova studimet për letërsi. Duke filluar të studioj, vazhdova të shkruaj, por që tash orientimi im është më shumë proza, e sidomos kah proza e shkurtër.
F.Bajraj: A mendoni që e keni arritur kulmin e karrierës suaj?
A.Mehmeti: Nuk do të doja që tani kur jemi duke u intervistuar të jem në kulmin e karrierës sime. Por a jam më mirë se dje, mendoj se po. Për një shkrimtar është e rëndësishme që dita e sotme të jetë më e mirë se e djeshmja, dhe e sotmja të jetë më e dobët sesa e nesërmja. Gjithmonë luftoj dhe punoj për të, edhe pse shpeshherë na kaplon dembelizmi, por mundohem të jem në hap me kohën.
F.Bajraj: A kujtoni ndonjë kohë kur mendoni se keni dështuar në këtë fushë?
A.Mehmeti: Mendoj se fillimet tona kanë qenë, atëherë kur ne kemi frikë nga dështimi, por që tash kanë kaluar thuajse dy dekada që nga fillimi i krijimtarisë. Tashmë nocioni i frikës i takon vetëm të kaluarës.
F.Bajraj: Sa e keni pas të vështirë dhe sfiduese të jeni këtu ku jeni sot?
A.Mehmeti: Një rrugë që nuk ka sfida, ai rrugëtim nuk do të jetë i suksesshëm. Sikur çdo shkrimtar, edhe unë kam pasur vështirësitë e mia, por të cilat u tejkaluan falë Zotit dhe ndihmës së njerëzve të mirë. Këto vështirësi vetëm sa kanë forcuar rrugëtimin tim dhe gjithmonë mundohem që të jem pranë atyre, të cilët janë duke hedhur hapat e parë në rrugën e krijimtarisë letrare, sepse e di se çfarë do të thotë ky rrugëtim dhe mbi të gjitha e di se çfarë janë stuhitë në këtë rrugë.
F.Bajraj: Me çka merreni jashtë kësaj, keni ndonjë profesion tjetër?
A.Mehmeti: Përveç profesionit për të cilin po flasim, tash e disa muaj, e gati u bë një vit jam duke ushtruar njërin ndër profesionet më të shenjta që një njeri mund ta ketë mbi supe, atë të mësuesisë. Ndjehem shumë i lumtur me profesionin, të cilin e kam ëndërruar. Mendoj se profesioni i shkrimtarit në njërën anë dhe i mësimdhënësit në anën tjetër vetëm sa më kanë plotësuar shpirtërisht.
F.Bajraj: A do t’ju shohim mbase në një të ardhme të afërt në ndonjë fushë krejtësisht tjetër?
A.Mehmeti: Falë Zotit ndjehem komod me profesionet që tani i kam, dhe nuk mund ta paramendoj vetën ndryshe. Siç thashë edhe më lart, tani ndjehem i plotësuar si kurrë më parë.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
A.Mehmeti: Letërsia e Kosovës gjithherë ka ditur t’i dhurojë lexuesit kryevepra. Edhe tani në kohën kur po flasim, letërsia e Kosovës po botohet, por fatkeqësisht nuk po lexohet. Mbase, një faj të madh kanë edhe botimi i letërsive të mëhallëve, të cilët më shumë shkruajnë sesa lexojnë, gjë që po e dëmtojnë letërsinë në përgjithësi dhe atë në Kosovë në veçanti.
F.Bajraj: Planet tuaja që do t’i realizoni së shpejti?
A.Mehmeti: Ka kohë që jam duke i paralajmëruar dy libra, njërin studimor dhe tjetrin roman, (e mbase edhe një me poezi). Sa do ta mbaj fjalën, do të flasim pas disa muajsh. Ju lutem, më mbani për fjale!
F.Bajraj: Si e shihni Kosovën pas 10 vitesh në fushën e letërsisë?
A.Mehmeti: Uroj që Kosova të këndellet dhe të krijohet një brez i ri i shkrimtarëve. Letërsia e Kosovës tani është e mangët dhe do të ketë vështirësi të këndellet pas shuarjes së dy yjeve të letërsisë, Xhevdet Bajrës dhe Adem Gashit. E di që boshllëkun e tyre s’do ta zëvendësojë askush, por duke e parë trendin e disa talenteve të rinj, shpresoj se ditë të bardha do të vijnë dhe letërsia e Kosovës do të gjendet aty ku ishte më parë, në piedestalet e letërsisë ballkanike dhe më tej.
