UEFA po ndjek se çfarë po ndodh në futbollin spanjoll dhe mund të reagojë duke përjashtuar klubet spanjolle nga garat e tyre, shkruan gazeta AS. Nëse politika përfshihet në futboll, mund të jetë një dënim që do ta marrë në konsideratë organi më i lartë i futbollit në Evropë, sipas gazetës spanjolle. Barcelona dëshiron të padisë Federatën Spanjolle të Futbollit (RFEF) për atë që e konsideron një padrejtësi në El Classico. Në këtë mënyrë, debati nëse Barcelona u dëmtua në humbjen 2:3 nga Real Madrid për anulimin e golit, i cili sipas katalanasve duhej të ishte njohur, duhet të zgjidhej përmes gjykatave.
Përveç këtij rasti, UEFA-s nuk i pëlqen fakti se Federata Spanjolle e Futbollit ende nuk ka zgjedhur presidentin e ri dhe për shkak të skandalit korruptiv, disa prej kandidatëve janë pezulluar. Po ashtu, Luis Rubiales, ish-presidenti i Federatës, është pezulluar nga të gjitha detyrat për tri vjet për shkak të skandalit seksist në finalen e Botërorit për femra. Sipas AS, kjo do të thotë se klubet spanjolle nuk do të mund të marrin pjesë në Ligën e Kampionëve, Ligën e Evropës dhe Ligën e Konferencave, dhe kombëtarja spanjolle në Kampionatin Evropian dhe Ligën e Kombeve.
