Prokuroria Themelore në Mitrovicë, Departamenti i Krimeve të Rënda pranë Gjykatës Themelore në Mitrovicë, ka paraqitur kërkesë për caktimin e paraburgimit për Q.M., inspektor i Administratës Tatimore të Kosovës në Mitrovicë, nën dyshimet për vepër penale marrja e ryshfetit. Po ashtu, e njëjta masë është kërkuar edhe për personin me iniciale S.S., nga Novi Pazari -Serbi, për shkak të dyshimit për kryerjen e veprës penale dhënia e ryshfetit. Q.M., inspektor i ATK në Mitrovicë, dyshohet se më 24 prill 2024, në parkingun e Terminalit Doganor në Mitrovicë, si person zyrtar në mënyrë të drejtpërdrejtë ka pranuar shumën e të hollave prej 135 eurove, në mënyrë që të mos veprojë në pajtim me detyrën e tij zyrtare.
Ndërsa S.S., dyshohet se me qëllim të lehtësimit të procedurave për lirimin e mallit, i jep dhuratë personit zyrtar shumën 135 euro, e gjithë kjo me qëllimin që i njëjti të mos veprojë në pajtim me detyrën e tij zyrtare. Seanca dëgjimore për caktimin e masës së paraburgimit pritet të mbahet ditën e premte, datë 26 prill 2024, në Gjykatën Themelore në Mitrovicë.
