Ndeshje tejet interesante na presin në xhiron e 13-të të Superligës në basketboll.
Kryendeshja zhvillohet në “Karagaq”, Peja e pret Sigal Prishtina. Pejanët janë të dytit në klasifikim me nëntë fitore e tre humbje, derisa kryeqytetasit të katërtit me shtatë fitore e pesë humbje.
Verdh e zinjtë e kanë fituar përballjen e parë ndaj bardh e kaltërve me rezultatin 80:95.
Kjo përballje zhvillohet të shtunën nga ora 19:00, e po atë ditë por nga ora 17:00 Trepça e pret Bashkimin.
Xehetarët janë në një seri prej pesë fitoreve radhazi dhe kërkojnë të gjashtën dhe blindimin e pozitës së parë në tabelë.
Në krahun tjetër, portokallinjtë do të paraqiten me trajnerin e ri, maqedonin Aleksandar Joncevski, i cili më parë ka qenë trajner i Trepçës.
Mitrovicasit kanë 10 fitore e dy humbje, derisa prizrenasit katër fitore e tetë humbje për pozitën e gjashtë.
Me plotë 22 pikë, Trepça e kishte fituar ndeshjen e parë ndaj Bashkimit.
Të dielën nga ora 17:00, Prizreni e pret Golden Eagle Ylli. Ekipi nga Suhareka kërkon fitoren e dytë radhazi dhe të mbetet në luftë në pozitat e para në tabelë, e prizrenasit të rikthehen tek pikët e plota.
Pas disa rezultateve të mira, Ylli është ngritur në vendin e tretë me shtatë fitore e pesë humbje, kurse Prizreni nuk po kalon edicion të mirë, janë të parafundit me katër fitore e tetë humbje.
Ylli e kishte fituar sfidën e parë kampionale me rezultatin 100:70.
Xhiroja e 13-të mbyllet me ndeshjen Vëllaznimi-Istogu. Gjakovarët janë favorit për të dal triumfues. Pas disa rezultateve fantastike, kuq e zinjtë nuk dinë për fitore që dy javë. Në tabelë janë të pestit me gjashtë fitore e po aq humbje, kurse mbyllet nga Istogu me vetëm një fitore, e plotë 11 humbje.
