Eksperti amerikan për Ballkanin Perëndimor, Alon Ben Meir thotë se marrëveshja e Ohrit nuk arriti objektivin e saj kryesor, që është procesi i pajtimit mes Kosovës dhe Serbisë.
Ben Meir i tha GazetësBlic se edhe pse janë dakorduar për marrëveshje, të dyja palët, as Kosova e as Serbia, sipas tij, nuk e kanë përmbushur shumicën e dispozitave të saj.
Ben Meir thotë se edhe sot pas një viti, tri çështjet konfliktuale mbetën të pazgjidhura ku përfshihet: Lejimi i anëtarësimit të Kosovës në organizata ndërkombëtare, mosgatitshmëria e Kosovës për Asociacionin dhe së treti, sipas ekspertit amerian, përderisa Kosova kërkoi të shpallte pavarësinë e saj përmes procesit të normalizimit të marrëdhënieve, për Serbinë ky proces do të ishte i pranueshëm vetëm me kusht që të mos konkludonte në asnjë mënyrë njohjen e Kosovës.
“Marrëveshja për rrugën e normalizimit ndërmjet Kosovës dhe Serbisë”, e njohur si marrëveshja e Ohrit, e arritur një vit nuk arriti të arrijë objektivin e saj kryesor, që është procesi i pajtimit ndërmjet Serbisë apo një minimum, duke stabilizuar marrëdhëniet mes dy vendeve dhe duke çuar në njohjen e pavarësisë së Kosovës nga Serbia”, tha Ben Meir.
“Edhe pse të dyja palët fillimisht ranë dakord për zbatimin e marrëveshjes, ato nuk e kanë nënshkruar atë ose nuk kanë përmbushur shumicën e dispozitave të saj. Megjithatë, disa pika, si përdorimi i dokumenteve dhe targave, janë zbatuar pjesërisht. Tri çështjet kryesore konfliktuale mbetën të pazgjidhura, kryesisht – së pari, Serbia refuzoi pëlqimin e saj për të lejuar Kosovën të anëtarësohet në ndonjë organizatë ndërkombëtare, përfshirë Kombet e Bashkuara; së dyti, mosgatishmëria e Kosovës për të ofruar një nivel të kënaqshëm të vetëqeverisjes për komunitetin etnik serb në veri të Kosovës përmes Asociacionit të Komunave Serbe; dhe së treti, përderisa Kosova kërkoi të shpallte pavarësinë e saj përmes procesit të normalizimit të marrëdhënieve, për Serbinë ky proces do të ishte i pranueshëm vetëm me kusht që të mos konkludonte në asnjë mënyrë njohjen e Kosovës”, shton tutje.
Sipas ekspertit amerikan, s’ka shanca që marrëveshja e Ohrit të realizohet deri në muajin prill, pasi do të jenë zgjedhjet në PE dhe në ShBA.
Por, sipas tij, gjatë kësaj kohe Kurti do ta ketë të pamundur të bëjë ndonjë lëshim afër zgjedhjeve në Kosovë, pasi siç thotë ai, jemi afër tyre.
“Nuk ka absolutisht asnjë shans që marrëveshja e Ohrit të realizohet deri në prill, që është data e synuar për zbatimin e saj. Pas kësaj, do të ketë zgjedhje si për Parlamentin Evropian, ashtu edhe për zgjedhjet presidenciale në SHBA. Kjo do të na sjellë edhe shumë afër zgjedhjeve të Kosovës, duke e bërë më të pamundur që Kurti të jetë i prirur për të bërë ndonjë lëshim pak para zgjedhjeve”, tha Ben Meir.
Në fund, Ben Meir i ka dërguar një mesazh të qartë kryeministrit Kurti apo kushdo që vjen në pushtet, ai thotë se askush nuk mund ta parandalojë pafundësisht zbatimin e Asociacionit.
“Është e vështirë të parashikohet fati i marrëveshjes së Ohrit pas këtyre zgjedhjeve, por dy gjëra duhet të jenë të qarta. Së pari Serbia nën Vuçiqin apo dikush tjetër duhet të jetë e vetëdijshme se pavarësia e Kosovës nuk është dhe nuk do të jetë subjekt i ndryshimit në asnjë mënyrë. Për Kosovën, pavarësisht se kush mund të bëhet kryeministër, ai apo ajo, duke përfshirë edhe vetë Kurtin, nuk do të jetë në gjendje të shmangë apo të parandalojë pafundësisht zbatimin eventual të Asociacionit të Komunave Serbe që do t’u mundësonte serbëve etnikë në Kosovë të ushtrojnë një nivel të lartë, niveli i vetëqeverisjes pa cenuar sovranitetin e Kosovës”, tha Ben Meir për GazetaBlic.
