Opinioni u befasua të dielën në mbrëmje, kur u raportua se Bedri Hamza ka ofruar dorëheqjen nga drejtimi i Partisë Demokratike të Kosovës, raporton Ekonomia Online.
Pas raportimeve në media, lajmi u konfirmua edhe nga partia, e cila njoftoi se Hamza është shprehur i gatshëm që kurdo që të hapet procesi, “të japë dorëheqje nga kjo pozitë”.
Megjithatë, ende nuk dihet arsyeja e vërtetë e gatishmërisë së Hamzës për ta lënë postin e kryetarit.
Më pas, në media qarkulluan lajme se vendin e tij mund ta zërë nënkryetarja e PDK-së, Vlora Çitaku.
Megjithatë, ajo nuk foli për këtë çështje, kur u pyet nga gazetarët këtë të hënë pas mbledhjes së Kryesisë së Kuvendit.
Nga PDK-ja kanë bërë të ditur se, në këtë fazë, partia është e përqendruar në finalizimin e hapave për mbështetjen e mbrojtjes së ish-krerëve të UÇK-së në Hagë, në fazën e apelit.
“Për çdo vendim dhe zhvillim zyrtar brenda partisë, do t’ju njoftojmë në kohën e duhur”, thuhet në njoftimin e partisë.
Ndërkaq deri më tani nuk dihet se kush do ta pasojë Hamzën në krye të PDK-së.
Vitin e kaluar, pas dorëheqjes së Memli Krasniqit nga kjo pozitë, deputeti i PDK-së, Enver Hoxhaj, kishte shpallur kandidaturën për kryetar të partisë.
Por, ai nuk arriti të zgjidhej në këtë post, pasi më 17 nëntor 2025, kryetar i PDK-së u zgjodh Bedri Hamza, i cili pasoi Krasniqin.
Hamza ka një karrierë të gjatë politike, gjatë së cilës ka ushtruar disa funksione të rëndësishme, përfshirë atë të deputetit, ministrit, kryetarit të komunës dhe guvernatorit të Bankës Qendrore të Kosovës.
Ai ka qenë ministër i Financave në dy mandate: në Qeverinë e dytë të Hashim Thaçit, gjatë periudhës 2011–2014, si dhe në Qeverinë e Ramush Haradinajt, nga viti 2017 deri më 2019.
Gjithashtu, Hamza ka drejtuar Komunën e Mitrovicës në periudhën 2021–2025. Ai ka qenë edhe kandidat i PDK-së për kryeministër të Kosovës në zgjedhjet e 9 shkurtit 2025, 28 dhjetorit 2025 dhe 7 qershorit 2026.
Hamza është kryetari i katërt i PDK-së që nga themelimi i kësaj partie. Para tij, partia është udhëhequr nga Hashim Thaçi, Kadri Veseli dhe Memli Krasniqi, ndërsa Enver Hoxhaj ka ushtruar detyrën e kryetarit për disa muaj.
Nga themelimi e deri në vitin 2016, PDK-ja u drejtua nga Hashim Thaçi, i cili dha dorëheqje pasi u zgjodh president i Kosovës.
Në krye të partisë më pas erdhi Kadri Veseli, i cili e drejtoi atë deri në nëntor të vitit 2020, kur dha dorëheqje pas ngritjes së aktakuzës nga Gjykata Speciale për krime të pretenduara lufte.
Pas largimit të Veselit, detyrën e kryetarit e mori Enver Hoxhaj, i cili qëndroi në këtë pozitë për disa muaj.
Më 3 korrik 2021, kryetar i PDK-së u zgjodh Memli Krasniqi. Ai u rizgjodh në këtë post më 21 qershor 2025, në Konventën e Përgjithshme të PDK-së, të njëmbëdhjetën me radhë.
