Deputeti i PDK-së, Përparim Gruda, ka kritikuar fjalimin e kryeministrit në detyrë, Albin Kurti, në Kuvendin e Kosovës lidhur me Ligjin për Dhomat e Specializuara.
Gruda ka thënë se fjalimi i Kurtit ishte, sipas tij, “dorëzim para përgjegjësisë” dhe se përbënte sabotim të ligjit, ndonëse në fund Kurti votoi pro tij.
“Fjalimi i Albin Kurtit në Kuvend për Ligjin për Gjykatën Speciale ishte dorëzim para përgjegjësisë që ka. Ishte, në thelb, sabotim i ligjit, pavarësisht se në fund e votoi”, ka shkruar Gruda.
Deputeti i PDK-së ka kritikuar Kurtin edhe për qasjen e tij ndaj procesit gjyqësor në Hagë, duke pretenduar se gjatë gjashtë viteve nuk ka ndërmarrë hapa lidhur me këtë çështje.
“Njeriu që për gjashtë vite të procesit gjyqësor në Hagë nuk ka ndërmarrë asnjë hap, sot fliste për strategji dhe për atë se si ky ligj nuk qenka i duhuri”, ka shkruar ai.
Gruda ka thënë se argumentet e përdorura nga Kurti kundër ligjit, sipas tij, mund të ndikojnë edhe në zbatimin e tij nga Gjykata Speciale.
“Madje, me argumentet që përdori kundër tij, veç sa nuk i bëri thirrje Hagës që të mos e zbatojë ligjin nëse miratohet”, ka shkruar Gruda.
