Kryeministri në detyrë, Albin Kurti, ka folur pas takimit me kryetarin e LDK-së, Lumir Abdixhiku, duke bërë të ditur se palët do t’i vazhdojnë bisedimet, raporton Ekonomia Online.
Kurti tha se gjatë takimit është rritur mirëbesimi mes palëve, ndërsa për herë të parë, sipas tij, është diskutuar konkretisht edhe për emra të përveçëm.
“Diskutimi ishte i hapur, i sinqertë, serioz. Do të vazhdojnë bisedimet për shkak se është rritur mirëbesimi dhe është hera e parë që kemi diskutuar me dhe për emra të përveçëm. Pra, atyre kritereve dhe parimeve udhëzuese për të cilat jemi dakorduar herën e kaluar lidhur me vlerat, meritat dhe kontributin kombëtar, shtetëror, profesional, qytetar të personaliteteve, figurave të ndryshme të shoqërisë e të vendit tonë, ua kemi bashkangjitur edhe emrat konkretë të cilët i kemi diskutuar dhe ky është një hap i rëndësishëm përpara. Tash negocimi është shumë i vështirë sepse duhet të diskutohet hollësisht e gjerësisht. Shumësia e emrave që trajtohen shtohet atëherë në radhën kur ka fjalën, sjell emër të ri dhe argumenton për filan personin, e më pastaj duhet të dëgjohen të tjerët se çfarë mendojnë për atë person, por lista e atyre emrave zvogëlohet atëherë kur është e qartë se nuk do të mund të ketë dakordim për ndonjë emër të përveçëm”, u shpreh Kurti.
“Ne do të jemi, siç e kemi thënë edhe në të kaluarën, plotësisht transparentë për këtë proces të negociatave me Lidhjen Demokratike të Kosovës, mirëpo në anën tjetër duhet ta ruajmë, duhet ta mbrojmë konfidencialitetin e bisedimeve të brendshme. Nuk janë emra të cilët ne i kemi pyetur paraprakisht se a do të pranonin apo se a dëshironin që të jenë president ose presidente të Republikës, sepse paraprakisht duhet të dakordohemi ne ndërmjet vete.
Andaj, në këtë fazë edhe nuk mund të flasim konkretisht për emrat e përveçëm të cilët në fakt për herë të parë sot jemi duke i trajtuar konkretisht si emra të posaçëm për president apo presidente të mundshme”, theksoi ai.
Takimi mes Kurtit dhe Abdixhikut ka zgjatur më shumë se dy orë, ndërsa diskutimet janë zhvilluar në kuadër të përpjekjeve për tejkalimin e ngërçit politik.
