Policia e Kosovës do të organizojë sot një sërë aktivitetesh përkujtimore me rastin e shënimit të Ditës Memoriale të Zyrtarëve të Policisë së Kosovës të rënë në kryerje të detyrës.
Aktivitetet do të zhvillohen në nderim të zyrtarëve policorë që sakrifikuan jetën në shërbim të rendit, ligjit, mbrojtjes së sovranitetit të vendit dhe sigurisë së qytetarëve. Në ceremonitë përkujtimore pritet të marrin pjesë përfaqësues të institucioneve më të larta të Republikës së Kosovës, drejtues të Policisë së Kosovës, familjarë të të rënëve, si dhe qytetarë.
Sipas agjendës, në orën 10:00 do të mbahen homazhe shtetërore pranë Lapidarit të Policëve të rënë në oborrin e Drejtorisë së Përgjithshme të Policisë së Kosovës në Prishtinë.
Në orën 11:00 do të zhvillohen homazhe te varri i Heroit Afrim Bunjaku në fshatin Samadrexhë të Vushtrrisë, ndërsa në orën 11:15 delegacionet shtetërore do të vizitojnë familjen e tij.
Më pas, në orën 12:15, do të realizohet një vizitë në familjen e Heroit Enver Zymeri në Vushtrri, ndërsa në orën 13:30 do të mbahen homazhe te lapidari në vendin e rënies së Heroit Enver Zymeri në Varagë të Zubin Potokut.
Policia e Kosovës u ka bërë thirrje përfaqësuesve të mediave që të përcjellin këto aktivitete, ndërsa ka ftuar edhe qytetarët të bashkohen në nderimin e kujtimit të zyrtarëve policorë që dhanë jetën në mbrojtje të rendit kushtetues, sigurisë publike dhe Republikës së Kosovës.
Sipas Policisë së Kosovës, sakrifica e zyrtarëve të rënë mbetet një frymëzim i përhershëm dhe një dëshmi e përkushtimit të institucionit në shërbim të qytetarëve dhe shtetit.
