Për herë të parë, Republika e Kosovës ka marrë pjesë në diskutimet për zhvillimin e qëndrueshëm në kuadër të Forumit Politik të Nivelit të Lartë të Kombeve të Bashkuara (HLPF 2026), ku theksoi nevojën për qasje të barabartë në financimin global për klimën dhe mjedisin.
Sipas një njoftimi të Qeverisë së Kosovës, ministrja e Mjedisit, Planifikimit Hapësinor dhe Infrastrukturës, Fitore Pacolli, deklaroi se qasja në fondet ndërkombëtare klimatike nuk duhet të kushtëzohet nga statusi politik i Kosovës në OKB, duke bërë thirrje për trajtim të barabartë në mekanizmat globalë të financimit.
Në fjalimin e saj, Pacolli theksoi se ndryshimet klimatike dhe sfidat në menaxhimin e burimeve ujore kërkojnë veprim të përbashkët ndërkombëtar. Ajo prezantoi edhe planin strategjik të Kosovës për ndërtimin e pesë digave të reja, të cilat synojnë forcimin e sigurisë së ujit dhe rritjen e rezistencës ndaj efekteve të ndryshimeve klimatike.
Sipas njoftimit, Kosova vlerësoi se arritja e Objektivit të Zhvillimit të Qëndrueshëm për ujin (SDG 6) nuk është e mundur pa partneritet të mirëfilltë global dhe pa përfshirjen e barabartë të të gjitha vendeve në instrumentet e financimit ndërkombëtar.
Kjo ishte paraqitja e parë e Kosovës në HLPF, forum që shërben si platforma kryesore e OKB-së për shqyrtimin e progresit në zbatimin e Agjendës 2030 për Zhvillim të Qëndrueshëm.
