Intervistoi: Fatijona Bajraj
Intervistë me kandidaten për asambliste në Kuvendin Komunal të Fushë Kosovës: Dr.Besa Berisha
Intervistoi: Fatijona Bajraj
Dr. Besa Berisha – Doktoreshë, humaniste dhe kandidate për Këshillin Komunal në Fushë Kosovë (Nr. 11, PDK)
Dr. Besa Berisha, doktoreshë e përkushtuar dhe qytetare aktive e Fushë Kosovës, ka vendosur të sjellë përvojën e saj profesionale në shërbim të qytetarëve përmes angazhimit politik. Me një karrierë të ndërtuar mbi kujdesin ndaj njerëzve dhe ndjeshmërinë për çështjet sociale, ajo garon për Këshillin Komunal të Fushë Kosovës në radhët e Partisë Demokratike të Kosovës, me numrin 11.
Për Dr. Besa Berishën, përfshirja në politikë nuk është ambicie personale, por nevojë për të ndryshuar realitetin shoqëror, veçanërisht në fushën e kujdesit shëndetësor dhe politikave sociale. “Si mjeke, çdo ditë përballem me sfidat që kanë qytetarët tanë. Besoj se përmes politikës mund të ndikoj në përmirësimin e jetës së tyre përmes vendimmarrjeve të drejta dhe transparente,” shprehet ajo.
Tri prioritetet kryesore për qytetarët e Fushë Kosovës
Dr. Berisha ka identifikuar tre shtylla themelore të programit të saj si kandidate:
Përmirësimin e cilësisë së shërbimeve mjekësore në QKMF, QMF dhe AMF;
Krijimin e ekipeve për kujdesin e hershëm dentar tek nxënësit e shkollave fillore;
Vizita të rregullta mjekësore në lagje dhe fshatra për krijimin e një baze të dhënash për gjendjen shëndetësore të popullatës.
Përfaqësim për të gjithë, pa dallim
Dr. Berisha thekson se si Këshilltare Komunale do të jetë zëri i çdo qytetari, pa dallim partie, etnie apo orientimi. Ajo planifikon të krijojë një platformë të hapur komunikimi në rrjete sociale, ku qytetarët do të mund të dërgojnë kërkesat dhe shqetësimet e tyre, si dhe të mbajë takime publike online para çdo mbledhjeje të Kuvendit Komunal.
“Do të jem çdo ditë në terren – në shkolla, ambulanca dhe drejtori – për të dëgjuar qytetarët dhe për të ndjekur nga afër çdo çështje që i prek ata,” shton ajo.
Fuqizimi i të rinjve dhe nxitja e punësimit
Një ndër prioritetet e saj është përfshirja aktive e të rinjve në tregun e punës dhe në jetën publike. Dr. Berisha propozon krijimin e bashkëpunimeve të qëndrueshme midis bizneseve lokale dhe institucioneve arsimore, për të mundësuar praktika profesionale, trajnime dhe programe punësimi.
“Të rinjtë tanë duhet të ndihen të vlefshëm këtu, në komunën tonë. Do të jem zëri i tyre për kushte të drejta pune dhe zhvillim profesional,” thekson ajo.
Për të ndalur largimin e të rinjve
Ajo planifikon të propozojë një Strategji Komunale për Rininë, e cila do të fokusohet në:
Mbështetjen e mikro-ndërmarrjeve rinore,
Përfshirjen e të rinjve në projektet komunale,
Bashkëpunimin me donatorë ndërkombëtarë për zhvillimin e programeve të vetëpunësimit dhe inovacionit.
Sipas saj, vetëm përmes mundësive konkrete për punë dhe zhvillim, të rinjtë do ta shohin të ardhmen e tyre në Fushë Kosovë.
Zhvillimi ekonomik dhe përkrahja e bizneseve të vogla
Në fushën ekonomike, Dr. Berisha do të shtyjë përpara ide konkrete për të ndihmuar bizneset lokale:
Krijimi i fondit komunal për start-up dhe ndërmarrje të vogla, me prioritet për gratë dhe të rinjtë;
Ofrimi i lehtësirave tatimore për bizneset që hapin vende të reja pune;
Themelimi i një Qendre për Mbështetje Biznesi për trajnime, mentorim dhe aplikim në fonde zhvillimore;
Organizimi i panaireve të produkteve vendore për promovimin e ekonomisë lokale;
Investime në infrastrukturë dhe digjitalizim, që lehtësojnë zhvillimin tregtar dhe bujqësor.
Arsimi dhe siguria e fëmijëve
Në fushën e arsimit, ajo thekson nevojën për përmirësim të kushteve në shkolla, duke propozuar:
Ndërtimin e rrugicave të sigurta para shkollave;
Pajisjen e shkollave me kabinete informatike moderne;
Rritjen e sigurisë dhe kushteve higjienike në institucionet arsimore;
Programe parandaluese kundër përdorimit të substancave narkotike në moshat e reja.
Një nga projektet më domethënëse të saj është krijimi i një Qendre Rehabilitimi për Fëmijët me Autizëm dhe Nevoja të Veçanta.
Kjo qendër do të ofrojë terapi zhvillimore, trajtime profesionale dhe mbështetje për familjet, duke qenë një model shembullor i përkujdesjes dhe përfshirjes sociale në nivel komunal. “Këta fëmijë kanë nevojë për dashuri, përkushtim dhe hapësira ku mund të zhvillohen me dinjitet,” shprehet Dr. Berisha.
Pse qytetarët duhet ta votojnë Dr. Besa Berishën?
“Fushë Kosova ka nevojë për përfaqësues të ndershëm, aktivë dhe të afërt me qytetarët. Unë do të jem zëri i tyre në çdo vendimmarrje. Si mjeke, jam mësuar të dëgjoj dhe të veproj me përgjegjësi — dhe këtë përkushtim dua ta sjell në Kuvendin Komunal,” thotë ajo.
Dr. Besa Berisha – Nr. 11 në listën e Partisë Demokratike të Kosovës – Për Fushë Kosovën që duam, me kujdes, dinjitet dhe zhvillim
F.Bajraj: Na flisni pse zgjodhët të merreni me politikë?
B.Berisha: Nevoja për ti ndryshuar gjërat, sidomos politikat sociale dhe kujdesin shëndetësor është arsyeja kryesore që i jam përveshur kësaj gare.
F.Bajraj: Cilat janë tri prioritetet kryesore për të cilat do ta ngritnit zërin dhe do të angazhoheshit në Kuvendin Komunal?
B.Berisha: a) Përmirësimi i cilësisë së shërbimeve mjekësore në QKMF, QMF dhe AMF;
b) Formimi i ekipeve për kujdesin e hershëm dentar te nxënësit dhe
c) Vizita të vazhdueshme mjekësore në lagje dhe fshatra për të krijuar të dhëna për shëndetin e popullatës.
F.Bajraj: Si do të siguroheni që në punën tuaj si këshilltar i Kuvendit Komunal do të përfaqësoni interesat e të gjithë qytetarëve të komunës, jo vetëm të atyre që ju kanë votuar?
B.Berisha: Si Këshilltare Komunale do të përfaqësoj interesat e banorëve pa dallim partie, etnie apo orientimi seksual. Do të ndërtoj një faqe në profilin tim social që do të jetë i hapur për të pranuar ankesat, kërkesat dhe shqetësimet e banoreve në çdo kohë, do të bëjë video lidhje publike për të pranuar kërkesat para çdo mbledhje të kuvendit. Do të jem në derën e çdo drejtorie, ambulante apo shkollë për të adresuar kërkesat e pranuara në çdo kohë.
F.Bajraj: Në cilat mënyra do të ngritni çështje për mbështetjen e të rinjve në krijimin e mundësive për punësim dhe zhvillim personal dhe profesional?
B.Berisha: Të rinjtë do të jenë target i vazhdueshëm i punës sime. Do të ndërtoj një komunikim të mirë me afarizmin për të plotësuar nevojat e tyre me punëtor, por do të jem edhe zëri i mbrojtjes së tyre.
F.Bajraj: A do të propozonit nisma konkrete në Kuvendin Komunal për parandalimin e largimit të të rinjve nga komuna? Nëse po, cilat?
B.Berisha: Do të punoj për ndërtimin e strategjisë për përfshirjen e të rinjve në nisma të ndryshme komunale, financim të mikro ndërmarrjeve dhe zhvillimin e potencialeve për projekte bashkë edhe me donator të ndryshëm.
F.Bajraj: Cilat çështje do të ngrini në Kuvendin Komunal për përmirësimin e cilësisë së arsimit dhe kushteve të shkollave në komunën tuaj?
B.Berisha: Arsimi në komunën tonë ka nevojë për përmirësim shumë. Ndërtimi i rrugicave të mbrojtura para shkollave është nisma e parë, pasi prindërit e kanë tepër të vështirë me i sjell fëmijët deri në shkolla në qytet, më pas pajisja me kabinete të informatikës dhe përmirësimi i sigurisë në shkolla dhe aspekti kryesor është kontrolli dhe parandalimi i përdorimit të narkotikëve nga moshat e vogla.
F.Bajraj: Si do të angazhoheni në Kuvendin Komunal për të siguruar më shumë mbështetje dhe përfshirje për personat me aftësi të kufizuara në jetën publike dhe shërbimet komunale?
B.Berisha: Për këto kategori të shoqërisë do të jem zëri i vazhdueshëm, kjo do të bëhet duke parë mundësinë e punësimit të tyre, angazhimin në trajnime dhe nisma të ndryshme komunale dhe atyre të afarizmit.
F.Bajraj: Për fund, pse mendoni se qytetarët duhet t’ju votojnë për t’i përfaqësuar në Kuvendin Komunal?
B.Berisha: Pasi një qytet i ngarkuar si i joni sheh mungesën e përfshirjes së qytetarëve në zgjidhjen e problemeve, pasi do të ngris zërin për shqetësimet e tyre dhe do të jem avokat i përfaqësimit të tyre.
