Intervistoi: Fatijona Bajraj
F.Bajraj: Na flisni pse zgjodhët të merreni me politikë?
J.Gashi: Zgjodha të merrem me politikë sepse dua të jem zë i ndryshimit dhe përfaqësimit të drejtë. Jam rritur me bindjen se çdo qytetar meriton mundësi të barabarta dhe një komunë që i shërben njerëzve, jo interesave të ngushta. Politika për mua është mjeti për të kontribouar drejtpërdrejt në zhvillimin e Klinës dhe për t’i kthyer shpresën të rinjve.
F.Bajraj: Cilat janë tri prioritetet kryesore për të cilat do ta ngritnit zërin dhe do të angazhoheshit në Kuvendin Komunal?
J.Gashi: Përmirësimi i kushteve në arsim dhe cilësisë së shkollave.
Mundësi më të mëdha për të rinjtë në punësim dhe zhvillim profesional.
Transparencë dhe llogaridhënie të institucioneve komunale ndaj qytetarëve.
F.Bajraj: Si do të siguroheni që në punën tuaj si këshilltar i Kuvendit Komunal do të përfaqësoni interesat e të gjithë qytetarëve të komunës, jo vetëm të atyre që ju kanë votuar?
J.Gashi: Unë e shoh këtë detyrë si përgjegjësi publike, jo partiake. Do të jem e hapur për çdo qytetar, pavarësisht bindjeve politike. Do të dëgjoj çdo zë dhe do të ngre çështjet që prekin jetën e përditshme të të gjithëve, nga shërbimet bazike, deri tek çështjet sociale e zhvillimore.
F.Bajraj: Në cilat mënyra do të ngritni çështje për mbështetjen e të rinjve në krijimin e mundësive për punësim dhe zhvillim personal dhe profesional?
J.Gashi: Duke kërkuar më shumë programe të trajnimit profesional në bashkëpunim me sektorin privat, mbështetje për iniciativat e të rinjve, si dhe krijimin e hapësirave ku ata mund të zhvillojnë ide, start-up dhe aktivitete kulturore.
F.Bajraj: A do të propozonit nisma konkrete në Kuvendin Komunal për parandalimin e largimit të të rinjve nga komuna? Nëse po, cilat?
J.Gashi: Po, një prej synimeve të mia kryesore është që të rinjtë të mos e shohin migrimin si të vetmen alternativë. Do të propozoj nisma për subvencionimin e bizneseve të reja të hapura nga të rinjtë, investime në fushën e kulturës dhe sportit, si dhe projekte që gjenerojnë vende pune brenda komunës.
F.Bajraj: Cilat ide do të shtyni përpara në Kuvendin Komunal për të nxitur zhvillimin ekonomik të komunës?
J.Gashi: Fokusin tek përkrahja e fermerëve dhe prodhuesve lokalë, nxitjen e investimeve private përmes lehtësimeve komunale, si dhe zhvillimin e turizmit lokal, duke e bërë Klinën më tërheqëse për vizitorë dhe biznese.
F.Bajraj: Cilat çështje do të ngrini në Kuvendin Komunal për përmirësimin e cilësisë së arsimit dhe kushteve të shkollave në komunën tuaj?
J.Gashi: Sigurimin e kushteve më të mira infrastrukturore në shkolla, pajisjen me mjete digjitale dhe moderne mësimore, si dhe mbështetje për mësuesit në ngritjen e kapaciteteve profesionale. Fëmijët tanë meritojnë arsim cilësor dhe shkolla të denja.
F.Bajraj: Si do të angazhoheni në Kuvendin Komunal për të siguruar më shumë mbështetje dhe përfshirje për personat me aftësi të kufizuara në jetën publike dhe shërbimet komunale?
J.Gashi: Do të kërkoj investime në qasje të lehtë fizike në çdo institucion, shërbime komunale të përshtatura për ta, si dhe programe sociale e punësimi për personat me aftësi të kufizuara. Barazia në shoqëri fillon nga ofrimi i kushteve të barabarta për secilin.
F.Bajraj: Për fund, pse mendoni se qytetarët duhet t’ju votojnë për t’i përfaqësuar në Kuvendin Komunal?
J.Gashi: Qytetarët fillimisht ftoj të votojnë LDK-në me kandidatin tonë për kryetar Arben Limanaj, një ndryshim i nevojshëm për Klinën tonë, sepse kandidatët tjerë kanë pasur mundësinë të realizojnë planet e tyre, gjë që se kanë bërë prej 18 vitesh. Ndersa mua duhet të më votojnë sepse jam e sinqertë në qëllimet e mia, kam energjinë dhe vullnetin për të punuar për të gjithë, dhe nuk vij me premtime t’kota. Vij me dëshirën për ta bërë Klinën një vend më të mirë për të jetuar, ku rinia sheh të ardhmen e vet, dhe ku qytetarët ndihen të përfaqësuar me dinjitet.
Faleminderit, numri im është 12 në listën e LDK-së 113.
