Intervistë me kandidatin për asamblist në Komunën e Skenderajt: Mentor Mehmeti
Intervistoi: Fatijona Bajraj
Mentor Mehmeti kam lindur në Mitrovicë 1976 dhe jetoj në Skenderaj. Kam studjuar në Fakultetin Filologjik, drejtimi Gjuhë dhe Letërsi Angleze. Përveç arsimit, kam përvojë pune në fushën e inxhinierisë kompjuterike. Vlerat që e udhëheqin janë ndershmëria, përkushtimi dhe përgjegjësia.
F.Bajraj: Na flisni pse zgjodhët të merreni me politikë?
M.Mehmeti: Jo gjithçka planifikon në jetë. Politika nuk ishte prioritet i jetës time. Por më kohe e kuptova qe ndryshimi nuk vjen vetvetiu, por me punë e përkushtim aty ku është vendimmarrja dmth politika. Ky është mandati im i dytë si këshilltar në Kuvendin Komunal dhe përvoja më ka mësuar se për të përmirësuar jetën e qytetarëve duhet të jesh i drejtpërdrejt më të gjithë. Për mua politika nuk është interes personal, por përgjegjësi shoqërore.
F.Bajraj: Cilat janë tri prioritetet kryesore për të cilat do ta ngritnit zërin dhe do të angazhoheshit në Kuvendin Komunal?
M.Mehmeti: Prioritetet e mia ishin dhe do të mbesin: zhvillimi ekonomik dhe hapja e vendeve të punës, përmirësimi i arsimit dhe mbështetja e të rinjve, si dhe bujqësia.
F.Bajraj: Si do të siguroheni që në punën tuaj si këshilltar i Kuvendit Komunal do të përfaqësoni interesat e të gjithë qytetarëve të komunës, jo vetëm të atyre që ju kanë votuar?
M.Mehmeti: Që nga mandati i parë kam qenë i qasshëm për secilin qytetar, pa dallime politike apo personale. Përfaqësimi nuk bëhet vetëm për një grup të caktuar kështu nuk rregullohet qyteti, prandaj duhet të përfshihen e gjithë komunën. Do të vazhdoj të jem zëri i çdo qytetari që ka nevojë të dëgjohet.
F.Bajraj: Në cilat mënyra do të ngritni çështje për mbështetjen e të rinjve në krijimin e mundësive për punësim dhe zhvillim personal dhe profesional?
M.Mehmeti: Kam qenë aktiv në grupet punuese të draftplanit për të rinjtë gjatë këtij mandati. Kam propozuar dhe do propozoj programe të reja për trajnime profesionale, përkrahje për start-up-et, si dhe më shumë mundësi në kulturë e sport. Të rinjtë kanë energjinë dhe ide, institucionet duhet t’u japin hapësirën për t’i realizuar.
F.Bajraj: A do të propozonit nisma konkrete në Kuvendin Komunal për parandalimin e largimit të të rinjve nga komuna? Nëse po, cilat?
M.Mehmeti: Po, patjetër, edhe gjatë këtij mandati shqetesim kryesor ka qenë largimi i të rinjve. Jam angazhuar dhe do të angazhohem që të kemi politika që mbajnë të rinjtë këtu mbështetje për bujqësi moderne, zhvillim të turizmit, përkrahje për bizneset e reja dhe krijim të kushteve që ata të shohin perspektivën në komunën tonë.
F.Bajraj: Cilat ide do të shtyni përpara në Kuvendin Komunal për të nxitur zhvillimin ekonomik të komunës?
M.Mehmeti: Gjatë mandatit tim kam pas angazhim në startup tek personat më aftësi të kufizuara ku janë ndihmuar shtat familje. Kështu që edhe tutje mendoj se mbështetje reale për bizneset e vogla e të mesme, kushte për investitorë privatë, si dhe përkrahje të vazhdueshme për fermerët janë investim në ekonomin komunale. Ekonomia lokale është baza e mirëqenies, prandaj aty duhet të fokusohemi.
F.Bajraj: Cilat çështje do të ngrini në Kuvendin Komunal për përmirësimin e cilësisë së arsimit dhe kushteve të shkollave në komunën tuaj?
M.Mehmeti: Gjatë mandatit tim fokusi im ka qenë mbrojtja e të drejtat e fëmijëve. Po ashtu besoj se krijimi i kushteve për mësim si rehabilitimi i shkollave, kushte higjienike të mira dhe pajisje moderne për mësim do janë adresimet e mija. Po ashtu, do të punoj për digjitalizimin e shkollave dhe programe shtesë që përgatisin nxënësit për tregun e punës.
F.Bajraj: Si do të angazhoheni në Kuvendin Komunal për të siguruar më shumë mbështetje dhe përfshirje për personat me aftësi të kufizuara në jetën publike dhe shërbimet komunale?
M.Mehmeti: Kërkesat kryesore gjatë mandatit ka qenë qasja e barabartë në të gjitha institucionet publike, kushte më të mira në shkolla dhe mbështetje financiare e sociale po ashtu edhe startup për ta. Personat me aftësi të kufizuara nuk kanë nevojë për mëshirë, por për mundësi të barabarta.
F.Bajraj: Për fund, pse mendoni se qytetarët duhet t’ju votojnë për t’i përfaqësuar në Kuvendin Komunal?
M.Mehmeti: Tani përmes klip videove në facebook po e tregoj angazhimin tim në mandatin që shkoj. Garës nuk po i hy për herë të parë. Kam përvojën e një mandati të plotë, jam treguar i përkushtuar dhe i qasshëm për qytetarët. Në këtë mandat të dytë do të jem edhe më i zëshëm e më i vendosur. Vota për mua është votë për përvojë, përkushtim dhe vazhdimësi.
