Intervistoi për Gazetën Frymëzimi: Ferdane Sahiti
Egzona Salihu-Rexhepi: Unë jam Egzona Salihu-Rexhepi, e lindur me 6 Dhjetor 1993 në Burojë, Skenderaj. Jam mësuese e gjuhës angleze me përvojë shumëvjeçare në arsimin parauniversitar dhe në sektorin privat të edukimit. Kam përfunduar studimet bachelor në Fakultetin e Filologjisë, në Universitetin e Prishtinës, në Degën e Gjuhës dhe Letërsisë Angleze. Studimet master i kam ndjekur në Universitetin e Evropës Juglindore, në drejtimin Mësimdhënia e Gjuhës Angleze (ELT), ku kam diplomuar në qershor të vitit 2020. Në vitin 2016 kam filluar të punoj si mësuese e gjuhës angleze në shkollën fillore “Enver Haliti” në Lubovec, Skenderaj. Ndërsa nga viti 2024 jam profesoreshë në gjimnazin “Hamëz Jashari.” Ndërkohë, kam qenë pjesë edhe e institucioneve të tjera edukative, si “The Cambridge School” në Skenderaj ku kam punuar 1 vit si menaxhere e degës pastaj si profesoreshë, dhe prej vitit 2020 jam pjesë e stafit në “Sidi Education”. Përvoja ime përfshin planifikimin dhe zhvillimin e orëve mësimore për nivele të ndryshme, hartimin e testeve, vlerësimin e nxënësve dhe krijimin e një ambienti mësimor që nxit angazhimin dhe mendimin kritik. Jam e apasionuar pas mësimdhënies dhe besoj në fuqinë që ka gjuha angleze për t’i hapur dyert e botës të rinjve tanë. Përveç anglishtes, jam e përkushtuar edhe ndaj edukimit qytetar dhe përfshirjes sociale – kam qenë pjesë e organizatës “TOKA” që nga viti 2020 dhe më herët kam qenë aktive në rrjetin “Peer Educators Network”, ku kam marrë pjesë në fushata dhe trajnime për barazi gjinore dhe pjesëmarrje të grave në vendimmarrje. Poashtu, kam marr pjesë në konferenca të ndryshme ndërkombëtare dhe vendore në veçanti do ta cilësoja “Java e Gruas” nga NDI . Jashtë profesionit, më pëlqejnë gjërat e thjeshta: ecjet në natyrë, librat, muzika dhe një kafe e mirë me miqtë.
F.Sahiti: Çfarë ju motivoi të zgjidhnit mësimdhënien e gjuhës angleze si profesion?
Egzona Salihu-Rexhepi: Gjithmonë kam pasur pasion për gjuhët dhe komunikimin. Anglishtja, si gjuhë ndërkombëtare, më ka dhënë mundësinë jo vetëm të mësoj, por edhe të ndikoj pozitivisht tek të tjerët. Poashtu, ka qenë si një dritare për t’i parë kultura e tjera.Të ndihmosh dikë të hapë dyert e botës përmes gjuhës është një motivim i madh.
F. Sahiti: Sa vite keni që punoni si mësues/profesor i anglishtes dhe si ka ndryshuar përvoja ndër vite?Egzona Salihu-Rexhepi: Kam 9 vite përvojë dhe me kalimin e kohës, kam parë si teknologjia, qasjet metodologjike dhe vetë pritshmëritë e studentëve kanë ndryshuar. Dikur mjaftonte libri, sot kërkohet interaktivitet, digjitalizim dhe personalizim i mësimdhënies.
F.Sahiti: Cilat janë ndryshimet më të mëdha që keni vërejtur tek studentët gjatë këtyre viteve
Egzona Salihu-Rexhepi: Studentët sot janë më të ekspozuar ndaj gjuhës përmes rrjeteve sociale, filmave dhe internetit, por kanë më pak durim dhe vëmendje. Kanë akses më të madh në informacion, por ndonjëherë mungon përkushtimi afatgjatë.
F.Sahiti: Pse mendoni se është e rëndësishme që të rinjtë të mësojnë anglishten sot?
Egzona Salihu-Rexhepi: Sepse anglishtja është gjuha e teknologjisë, shkencës, biznesit dhe komunikimit global. Njohja e saj u jep të rinjve mundësi që nuk i kanë kufijtë e vendit të tyre.
F.Sahiti: Sa ndikon gjuha angleze në mundësitë për punë, arsim dhe komunikim global?
Egzona Salihu-Rexhepi: Shumë. Në shumicën e fushave profesionale, anglishtja është kusht. Është çelësi për bursa, punë jashtë vendit, rrjete ndërkombëtare dhe informacione të dorës së parë.
F.Sahiti: A ndikon gjuha angleze në ruajtjen apo zbehjen e identitetit kulturor dhe gjuhësor?
Egzona Salihu-Rexhepi: Varet si përdoret. Nëse përdoret si mjet për të mësuar dhe komunikuar pa e neglizhuar gjuhën dhe kulturën tonë, është vlerë. Problemi lind kur bëhet zëvendësim, jo bashkëjetesë.
F.Sahiti: Cilat metoda të mësimdhënies rezultojnë më efektive në klasë?
Egzona Salihu-Rexhepi: Metodat që përfshijnë studentin aktivisht: punë në grupe, simulime reale, përdorimi i teknologjisë dhe kombinimi i katër aftësive (dëgjim, lexim, të folur dhe të shkruar) në mënyrë të balancuar.
F.Sahiti: Cilat janë sfidat më të zakonshme që hasin studentët gjatë të mësuarit të anglishtes?
Egzona Salihu-Rexhepi: Frika nga gabimet, mungesa e praktikës jashtë klase, mungesa e vetëbesimit dhe shpesh, qasja tradicionale që i bën mësimet të thata dhe jo tërheqëse.
F.Sahiti: Si ndikon teknologjia në të nxënit e gjuhëve të huaja sot?
Egzona Salihu-Rexhepi: Nëse përdoret mirë, është përparësi e madhe. Aplikacionet, videot, platformat interaktive dhe përmbajtja online mund të ndihmojnë shumë, por mund edhe të shpërqendrojnë nëse nuk ka disiplinë.
F.Sahiti: Çfarë i bën studentët të jenë të suksesshëm në të mësuarit e gjuhës angleze?
Egzona Salihu-Rexhepi: Vullneti, qëndrueshmëria dhe ekspozimi i vazhdueshëm ndaj gjuhës. Ata që praktikojnë rregullisht, nuk frikësohen të gabojnë dhe janë të hapur ndaj mënyrave të ndryshme të të nxënit, arrijnë sukses.
F.Sahiti: Si mund të motivohet një student që ka vështirësi me gjuhën?
Egzona Salihu-Rexhepi: Duke e lidhur gjuhën me interesat e tij personale, për shembull, muzikën, filmat apo hobitë. Gjithashtu, duke i dhënë suksese të vogla dhe lavdërime konkrete që e nxisin të ecë më tej.
F.Sahiti: A mendoni se mësimi i gjuhëve të huaja në Kosovë është në nivelin e duhur?
Egzona Salihu-Rexhepi: Ka përparime, por ka edhe mangësi. Shumë mësues janë të përkushtuar, por mungojnë burimet moderne dhe trajnimi i vazhdueshëm. Sistemi ka nevojë për më shumë investim në cilësi, jo vetëm në numër orësh.
F.Sahiti:Çfarë këshille do t’u jepnit studentëve që duan të përmirësojnë anglishten e tyre? Egzona Salihu-Rexhepi: Të praktikojnë çdo ditë, qoftë edhe pak. Të lexojnë, të dëgjojnë, të flasin dhe të shkruajnë. Të përdorin çdo mundësi për ta futur gjuhën në përditshmëri. Konsistenca është çelësi.
F.Sahiti: Si e shihni të ardhmen e gjuhës angleze në arsimin shqiptar?
Egzona Salihu-Rexhepi: Anglishtja do të vazhdojë të jetë një nga shtyllat e edukimit. Por sfida do të jetë që të mos mbetet vetëm një lëndë teorike, por të jetë funksionale dhe e zbatueshme në jetën reale.
F.Sahiti: Cili është mesazhi juaj për gjeneratat e reja që po rriten në një botë shumëgjuhëshe?
Egzona Salihu-Rexhepi: Përdorni gjuhët për të ndërtuar ura, jo për të humbur rrënjët. Mësoni sa më shumë, por mos harroni kush jeni. Gjuha është fuqi, përdoreni për të ndërtuar, jo për të imituar.
