N’kërkime t’munimta hafëz
Që funi me iu ardhë s’dijka
E treta shpirtin tem si gjethen
Që behari prapë se bijka
Lypa ujë me e shu etjen
Etja n’buzë t’mia bani ven
Lypa trosha n’sofra t’vjetrune
Troshat e mallit s’u qitkan n’én
Lypa me pa nurin e shemsit
Qysh rrezon n’ftyrën e tij
Kur vetullat i bijnë piklluem
E tan dynjaja n’hije m’rri
Udhës t’dynjasë gjanë çka lyp
Udhës t’ashkut u gjinka coll malli
Udhët e dynjasë paskan boshllëqe
Unë jam ngarkue shkue hamalli
Me t’lypun a gjinet Haku
Me t’lypun a shuhet malli
Me t’lypun a ngjallet zemra
Me t’lypun a shkymet zjarri
N’kërkime t’errëta t’kujtimeve tua
Strukun n’rrënojat e dashnisë
T’ka mbetë hala buzëqeshja
Që n’kasnak t’shpirtit e kam qendisë
