Presidenti i Komitetit Paralimpik Evropian, holandezi Raymon Blondel, po qëndron për herë të parë në Kosovë, pak më shumë se një vit pas anëtarësimit të Kosovës në familjen botërore të parasportit, raporton EO.
Ai, së bashku me drejtues të Komitetit Paralimpik të Kosovës, mbajti një konferencë për media, ku u vlerësua progresi i shënuar në zhvillimin e sporteve për persona me aftësi të kufizuara.
Presidentja e Komitetit Paralimpik të Kosovës, Njomza Emini, tha se kjo ditë shënon një moment të veçantë në historinë paralimpike të vendit.
“Sot Kosova shkruan një kapitull të veçantë në rrugëtimin e saj paralimpik. Kjo vizitë nuk është thjesht një takim formal apo një vizitë pune, është një dëshmi e fortë, një mesazh shprese dhe një mbështetje që vjen nga zemra e lëvizjes paralimpike evropiane për një vend të vogël në hartë, por me zemër të madhe dhe me ambicie që shikojnë kah sporti botëror. Prania juaj këtu është më shumë se një simbol, është një përfaqësim i sinqertë për Kosovën dhe sportistët tanë që çdo ditë sfidojnë jo vetëm kundërshtarët në fushë, por edhe veten, vështirësitë, paragjykimet dhe mungesat. Faleminderit që jeni këtu, që po e prekni këtë realitet”, u shpreh Emini.
Nga ana e tij, presidenti i EPC-së, Raymon Blondel, theksoi rëndësinë që ka barazia mes sportit olimpik dhe atij paralimpik.
“Për ju, por edhe për mua, viti 2023 ishte një moment shumë emocional. Gjatë Asamblesë së Përgjithshme të Komitetit Paralimpik Evropian në gusht të vitit 2023 në Roterdam, KPK-ja e Kosovës u mirëprit si anëtare e re. Një anëtare e re me shumë energji dhe me vullnetin, këmbënguljen dhe besimin për të zhvilluar sportin paralimpik në Kosovë. Sipas mendimit tim, sporti paralimpik është një mjet i jashtëzakonshëm për të synuar një shoqëri më gjithëpërfshirëse. Këtë mëngjes patëm mundësinë të shohim një aktivitet të vogël në Prishtinë, ku dy ekipe paralimpike zhvilluan një ndeshje volejbolli. Ishte një shembull i bukur i zhvillimit të sportit. Por dua të theksoj se duhet të trajtohet njësoj sporti olimpik dhe ai paralimpik. Numri i atletëve mund të mos jetë i njëjtë, por mënyra e qasjes duhet të jetë e barabartë. Kjo është barazia e vërtetë”, theksoi Blondel.
Zëvendëspresidenti i KPK-së, Daut Tishuki, falënderoi Blondel për përkrahjen që ka dhënë për ndërkombëtarizimin e sportistëve kosovarë.
“Jam i gëzuar sot që presidenti na ka nderuar me vizitën e tij të parë në Kosovë dhe shpreh falënderimin tim për përkrahjen që na ka dhënë që të ndërkombëtarizohemi dhe të marrim pjesë në gara parasportive të barabarta me parasportistët e vendeve të tjera”, deklaroi Tishuki.
Në konferencë foli edhe paraatleti Fatmir Sheremeti, i cili tregoi rrugëtimin e tij personal dhe ndikimin e parasportit në jetën e tij.
“Gjithmonë kam dëshiruar që edhe flamuri ynë krenar të përfaqësohet atje. Në Paris, kur isha si i ftuar nga IPC-ja, pata nderin të shoh flamurin tonë atje, të përfaqësuar nga miku im Grevist. Tani, pasi përfundova karrierën në sportin parasportiv në Suedi, kam vendosur të përpiqem të kualifikohem për LA 2028 dhe Brisbane në triatlon për Kosovën. Parasporti më ka shpëtuar jetën. Kur e humba shikimin si adoleshent, nuk e shihja të ardhmen. Por përmes sportit, gjeta një rrugë të re. Sot jam një individ i pavarur në Suedi me kompaninë time. Dhe ëndërroj që edhe në Kosovë, parasporti të krijojë të njëjtat mundësi dhe respekt si në Suedi”, tha Sheremeti.
