Përzgjedhësi i Kosovës, Franco Foda, ka dhënë një konferencë për media para dy ndeshjeve që “Dardanët” do t’i zhvillojnë gjatë këtij muaji, raporton Ekonomia Online.
Kosova do të luajë ndaj Islandës dy ndeshje vajtje-ardhje të vlefshme për ‘play-off’ të Ligës së Kombeve.
Mes tjerash Foda u pyet edhe për situatën me lëndime tek ‘Dardanët’ ku sqaroi vendimin e tij për ta bërë pjesë të grumbullimit Qëndrim Zybën.
Sipas Fodës, dyshja Fisnik Asllani dhe Florent Hadërgjonaj si pasojë e lëndimeve që kanë pësuar me klubet respektive, kanë mbetur të detyruar të tërhiqen nga grumbullimi.
“Fisnik Asllani dhe Florent Hadërgjonaj kanë pësuar lëndime me klubet e tyre dhe ne kemi vendosur ta ftojmë Qëndrim Zybën”, ka thënë shkurtimisht Foda.
Përzgjedhësi i Kosovës ka thënë se në rast se Korenica vazhdon me formën e tillë deri në qershor mund të jetë pjesë e listës.
“Fatkeqësisht nuk mund t’i ftojmë 30 lojtarë, kemi menduar t’i ftojmë vetëm 25 lojtarë, këta na kanë bindur se janë të duhurit”.
“Në qershor i kemi ndeshjet tjera, nëse lojtari në fjalë vazhdon me formë të tillë, atëherë mund të ketë ftesë edhe për të”, tha Foda.
Kujtojmë se ndeshja e parë ndaj Islandës do të luhet më 20 mars në ‘Fadil Vokrri’ teksa ajo e kthimit tri ditë më vonë (23 mars).
