Ministri i Mbrojtjes, Ejup Maqedonci u ka shprehur ngushëllime më të sinqerta autoriteteve shtetërore turke, ministrit Yaşar Güler, Forcave të Armatosura Turke dhe familjarëve të ushtarakëve të vdekur, pas rrëzimit të dy helikopterë ushtarakë në Turqi që u përplasën në ajër, raporton Ekonomia Online.
“Jashtëzakonisht i tronditur me lajmin e sotëm rreth aksidentit ajror me fatalitet që ka ndodhur në regjionin në Isparta ku Komanda e Shkollës së Aviacionit Tokësor të Ushtrisë Turke kryen trajnimet.Shprehi ngushëllimet e mija më të sinqerta autoriteteve shtetërore turke, ministrit Yaşar Güler, Forcave të Armatosura Turke dhe familjarëve të ushtarakëve të vdekur”, thuhet në njoftim.
Maqedonci ka njoftuar se pjesëtarët e FSK-së që ndodhen në Turqi dhe në këtë kazermë janë mirë dhe të sigurtë
“Fatmirësisht pjesëtarët e FSK-së të cilët aktualisht janë duke ndjekur trajnimet në këtë kazermë kanë qenë larg vendit të incidentit dhe janë mirë e të sigurte. Në këto momente të vështira ndajmë dhimbjen me popullin turk.Qoftë i paharruar kujtimi për martirët!Lavdi!”, ka shkruar Maqedonci.
Dy helikopterë ushtarakë në Turqi u përplasën në ajër të hënën, duke shkaktuar rrëzimin e njërit prej tyre dhe duke lënë të vdekur gjashtë personel ushtarak në bord, thanë zyrtarët. Helikopteri i dytë u ul i sigurt.
Pesë nga viktimat vdiqën në vendin e aksidentit ndërsa, personi i gjashtë nga plagët e marra ndërroi jetë në spital, tha ministria e mbrojtjes.
Përplasja ndodhi në provincën jugperëndimore të Ispartës gjatë fluturimeve të rregullta stërvitore, sipas guvernatorit të rajonit, Abdullah Erin.
Një gjeneral brigade që ishte në krye të shkollës së aviacionit ushtarak ishte mes viktimave, tha ai.
Nuk dihet menjëherë se çfarë e shkaktoi kontaktin e dy helikopterëve. Erin tha se një hetim ka nisur, raporton Associated Press,.
Agjencia private e lajmeve DHA tha se helikopteri UH-1 u rrëzua në një fushë dhe u nda në dysh. Helikopteri i dytë u ul rreth 400 metra larg.
