Intervistë me poetin: Leotrim Vladi
Intervistoi për Gazetën Frymëzimi: Fatijona Bajraj
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi? Pse bash poezia?
L.Vladi: Nuk mund ta them saktë kur ishte fillimi! Dikur në adoleshencë ndoshta kur fillova të mendoja për botën dhe çështjet që na preokupojnë, për vdekjen, për jetën dhe për ndjenjat. Gjithmonë më kanë pëlqyer ata që thonë shumë me pak fjalë, prandaj e zgjodha poezinë sepse ajo e bën më së miri këtë.
F.Bajraj: A mendoni që e keni arritur kulmin e karrierës suaj?
L.Vladi: Mendoj që sapo kam filluar, botova librin tim të parë “Vdekja që lind jetën” i cili ka ca muaj që doli nga shtypi. Kam botuar shkrime në revista dhe vazhdoj ende por është vetëm fillimi.
F.Bajraj: A kujtoni ndonjë kohë kur mendoni se keni dështuar në këtë fushë?
L.Vladi: Nuk pretendoj të arrij diçka të madhe, prandaj s’mund të dështoj. Nëse shkrimet e mia pëlqehen më vjen mirë, nëse jo prapë do të shkruaj sepse prapë do të mendoj. Përderisa mendimet vijnë, s’mendoj që është gjë e mirë t’i lë të ikin pa gjurmë.
F.Bajraj: Sa e keni pas të vështirë dhe sfiduese të jeni këtu ku jeni sot?
L.Vladi: Siç e thashë jam vetëm në fillim, s’kam bërë asgjë të madhe por s’ka rrugë të lehtë, sidomos në vendin tonë. Pengesa dhe mure gjithandej por duhet t’i kalojmë sepse s’kemi zgjidhje tjetër.
F.Bajraj: Me çka merreni jashtë kësaj, keni ndonjë profesion tjetër?
L.Vladi: Jam jurist me profesion dhe punoj në këtë fushë. Ta them në gjuhen e juristit, “poezitë janë rregullat e një bote të jashtëzakonshme.”
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
L.Vladi: Nuk kam synime të tilla, profesioni dhe shkrimet e mia. Megjithatë nuk i dihet, ne nuk e njohim të ardhmen, Zoti e di çfarë ka planifikuar për ne.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
L.Vladi: Është thënë shpesh, ne shqiptarët jemi shumë të zotë në profesionet individuale. Shkrimtarë të mëdhenj, talentë të shumtë por si çdo fushë tjetër duhet të ndihmohet nga shteti që letërsia t’i ndihmojë fillimisht vetes, pastaj edhe shtetit.
F.Bajraj: Planet e juaja që do t’i realizoni së shpejti?
L.Vladi: Të vazhdoj të shkruaj, të botoj librin e radhës dhe të punoj në profesion, thjeshtë rrjedhshmëri dhe zhvillim…
F.Bajraj: Si e shihni Kosovën pas 10 vitesh në fushën e letërsisë?
L.Vladi: Shpresoj që gjërat të ndryshojnë pozitivisht. Ne harrojmë që për të vepruar njerëzit e vegjël duhet të mendojnë njerëzit e mëdhenj. Jo rastësisht shtetet me letërsinë më të zhvilluar janë shtetet më të fuqishme në botë. Nuk pres të befasohem nga zhvillimet në vendin tonë por nëse ndodh, do të më vije mirë.
