Intervistë me gazetarin Muharrem Vojvoda, kryeredaktor i Gazetës “Ditori”
Intervistoi për Gazetën Frymëzimi: Fatijona Bajraj
F.Bajraj: Si është gjendja momentale në Mitrovicë në përgjithësi dhe Veriu në veçanti?
M.Vojvoda: Gjendja momentale në qytetin e Mitrovicës duket se është ashtu siç edhe përshkruhet shpesh, e qetë por, me një qetësi të brishtë. Jugu i qytetit është gjithmonë i njëjti, me telashin kryesor gjendjen e rënduar ekonomike, pasi edhe siç dihet Mitrovica ka numrin më të lartë në vend të rasteve sociale. Një tjetër problematikë po ashtu e llojit ekonomik është se dhe pagat në sektorin privat janë ndër më të ulëtat në Kosovë. Ndërsa kur flitet për veriun e qytetit gjithmonë flitet me theks në aspektin e sigurisë që për momentin në pamjen e jashtme duket se është më e mira e mundshme që nga paslufta, kjo falë profesionalizmit dhe përkushtimit të lartë të organeve të sigurisë.
F.Bajraj: A po lëvizin lirshëm qytetarët? A ndodhë të kenë pengesa?
M.Vojvoda: Po qytetarët sot lëvizin më lirshëm se kurrë në të dyja anët e qytetit. Edhe ura e Ibrit duket më e frekuentuar sikur më parë, ndonëse vazhdon të mbetet e mbyllur. Qytetarët lëvizin lirshëm por, me doza të frikës së ngulitur nga trauma e kamotshme nga bandat që dikur kontrollonin këtë pjesë si dhe nga provokimet aty këtu nga serbët lokalë, ndonëse unë këto i konsideroj si incidente të vogla dhe të izoluara.
F.Bajraj: Sa po frekuentohen kafenetë e hapura nga shqiptarët në pjesën veriore?
M.Vojvoda: Kafenetë e hapura së fundmi nga shqiptarët vazhdojnë të mbesin të frekuentuara edhe pse kryesisht nga shqiptarët që vijnë nga jugu i qytetit. Pengesë e vetme nëse mund të themi hë për hë është moti i ligë që nuk ua mundëson qytetarëve të pijnë kafen në ambiente të hapura.
F.Bajraj: Si është pritur hapja e kafeneve, postës, markantëve në atë anë?
M.Vojvoda: Kjo pyetje ka dy përgjigje krejtësisht në situata të ndryshme. Nga banorët lokalë Serbë nuk është pritur aspak mirë, madje është konsideruar si “pushtim” nga ana e shqiptarëve si dhe shikohet me syrin e politikës, ku këta banorë këto lokale i konsiderojnë si shfrytëzim nga ana e politikës për poena politike të tyre ndërkohë nga shqiptarët është mirëpritur me një entuziazëm të madh të cilët e konsiderojnë edhe si bashkim të qytetit dhe ëndërr të realizuar pas 24 vitesh pritjeje.
F.Bajraj: Ju si i lindur dhe rritur në Mitrovicë keni kaluar jetën herë andej ure herë këndej, sa dallim ka Mitrovica ndër vite?
M.Vojvoda: Të flasësh për dallimet e Mitrovicës ndër vite nuk do të mjaftonte një intervistë e vetme, madje as një emision i vetëm, madje nuk do të mjaftonte as një dokumentar i vetëm. Kjo sepse ky qytet ka ndryshuar në shumë sfera, po e them shkurt ndryshimet janë të theksuara që nga aspekti kulturor, artistik, politik e deri te ai socio-ekonomik. Në aspektin kulturor e dinë të gjithë në veçanti gjeneratat më të vjetra që ka qenë qendra e artit dhe kulturës, ndërsa sot mjerisht është qendra e diçkaje krejt të pavlerë, ndonëse së fundmi ka përpjekje për rikthimin e namit të dikurshëm me një jazz festival që po organizohet mjaft mirë, pastaj me rimëkëmbjen e teatrit, por lë për të dëshiruar interesimi i audiencës. Nëse flasim në hijen e politikës Mitrovica nga një qytet i madh sot është i ndarë në dy njësi administrative jug e veri, për pasojë me probleme të shumta edhe në sferën e sigurisë ani pse aktualisht është mirë. Kur jemi te ekonomia po i bije shkurt, nga qyteti më i pasur dikur sot radhitët njëri ndër qytetet më të varfër.
F.Bajraj: Çka mund të presim në një të ardhme të afërt nga Mitrovica?
M.Vojvoda: Është fakt i rëndë që përgjigja për këtë pyetje është se gjithçka po varet nga politika. Mitrovicën të gjithë po e duan kur arrijnë të vjelin diç nga ajo, dhe askush nuk po e do kur po u bëhet si barrë e politikave dhe gjeopolitikave për interesa të fuqive të mëdha.
