Imer Topanica nga Lista për Familjen ka reaguar pas adresimit të mbrëmshëm të Kryeministrit Albin Kurti, për sa u përket doracakëve për edukim seksual. Ndër të tjera ai ka thënë se e vetmja luftë hibride që është bërë përgjatë këtyre viteve, është ajo kundër familjes. Lexojeni të plotë reagimin:
Është bërë një luftë hibride, është e vërtetë, por kundër familjes dhe jo kundër qeverisë aktuale!
Nëse ka një luftë hibride në këtë mes, ajo është orientuar kundër familjes, ndërsa orkestruesja e saj është vetë partia në pushtet!
Qytetarë të dashur,
Mbrëmë kryeministri në largim na u ankua duke thënë se tha se “Lufta hibride kundër qeverisë dhe shtetit” është intensifikuar si asnjëherë më parë, duke e ricikluar edhe një herë temën e doracakëve.
Së pari ai dëshmoi që nuk e kupton togfjalëshin “luftë hibride”, ose, edhe më keq, provoi përmes propagandës, ta luftonte atë që pretendonte se është propagandë!
Ata doracakë, edhe sikur të ishin jashtëkurrikularë, janë turp!;
Edhe sikur të mos kishin qenë të dedikuar për tekste shkollore, janë turp!;
Edhe sikur të mos ishin lëndë të obligueshme, janë një turp!;
Dhe kjo nuk mund të lejohej të kapërdihej!
‘LISTA PËR FAMILJEN’ ka vizion të qartë, e di se ku do të arrijë, nuk ka nevojë që oponentët politikë ta bartin brengën për fatin e saj.
Na vjen mirë që tek pas daljes sonë në publik, kauza PËR FAMILJEN, është bërë përnjëherë e vlefshme edhe për subjektet e tjera. Disa s’arrijnë të jenë më shumë se sa imitues kauzash, por kjo nuk na shqetëson aspak.
‘LISTA PËR FAMILJEN’ e ka thënë shumë troç: përmbajtja e doracakëve, bashkë me nenet e kontestuara të projektkodit civil, projektligjit për fertilizim dhe iniciativave të tjera ligjore, janë në harmoni me agjendën LGBTQI+, të cilën u nxituan ta çojë përpara.
Ky është “progresi” i vetëm i kësaj qeverie!
E ritheksojmë, e vetmja luftë hibride që është bërë për këto katër vite, është ajo kundër familjeve tona, por qytetarët e kanë kuptuar.
E vërteta ka triumfuar tashmë, e keqja nuk kalon!
Imer Topanica
