Intervistoi për Gazetën Frymëzimi: Ferdane Sahiti
Murtez Asllani: jam lindur më 09.04.1948 në fshatin Vojnoc të Komunës së Shtimes. Pas tetëvjeçares dhe shkollës së mesme vazhdova studimet në Fakultetin e Filologjisë në Prishtinë,ku diplomova për Gjuhë dhe Letërsi Shqipe.
Pastaj punova mësimdhënës i gjuhës shqipe në SHF”Skënderbeu” në fshatin Kraishtë të Komunës së Lipjanit.
Ndërkaq,nga viti 1973 punova profesor në SHFMU”Lasgush Poradeci” në Muzeqinë,Shtime derisa u pensionova.
Jetoj e krijoj në fshatin e lindjes.
F.Sahiti: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia
Murtez Asllani: Me letërsi kam filluar të merrem nga klasa e tetë,kur vjersha ime për vendlindjen u botua në revistën”Pionieri”,e cila atëherë shërbente si një abetare.Pastaj vazhdova në shkollë të mesme dhe në universitet.Vjershat i lexoja në orët letrare,por i botoja rrallë. Të gjitha i leja të shkruara në një fletore.Letërsinë e veçmas poezinë i kam në shpirt e në zemër dhe kurrë s’jam ndarë prej saj.
Njeriu që merret me poezi duhet ta ndiejë e ta përjetojë thellësisht temën e poezisë dhe rregullat që ka ajo.Bashkëpunova me të gjitha gazetat për fëmijë dhe të rritur,si”Pionieri”,”Zog mëngjesi”,”Flaka e vëllazërimit”,”Rilindja”,”Zëri i rinisë ” etj.Merresha edhe me gazetari dhe isha bashkëpunëtor i jashtëm i”Radio Ferizaj”.
F.Sahiti: A mendoni që e keni arritur kulmin e karrierës suaj?
Murtez Asllani: Askush s”ka arritur ta përfundojë misionin e tij me letërsi.Për të arritur në kulm të veprimtarisë duhet punuar shumë e me kujdes.Ajo të hyjë në shpirtin e lexuesit.Edhe pse kam botuar katër përmbledhje voluminoze me poezi dhe dy monografi,ende nuk jam ngopur,por vazhdoj të shkruaj vazhdimisht.Kam të përgatitura edhe dy përmbledhje me poezi,por mungojnë mjetet finansiare për botimin e tyre.Poezia është shpirti im,jeta ime.
F.Sahiti: Me çka mirreni jashtë kësaj, keni ndonjë profesion tjetër?
Murtez Asllani: Kryesisht merrem me shkrime,pasi karrierën time prej mësimdhënësi e kam përfunduar para disa vjetësh. Muza ime rri zgjuar dhe kështu nuk ndalem duke shkruar, sidomos poezi dhe atë me motive të ndryshme.Përpiqem të jem sa më origjinal në krijimtari.
Së shpejti do të botoj ditarin tim nga puna edukativo-arsimore,si dhe një dramë të shkurtër që e kam pagëzuar”Rruga e lirisë”.
F.Sahiti: Çfarë komenti keni lidhur me gjendjen e letërsisë në përgjithësi në Kosovë dhe Shqipëri?
Murtez Asllani:Viteve të fundit letërsia në përgjithësi ka marrë një hov të madh.Botohen çdo ditë vepra të ndryshme,disa ndoshta pa kriter.Vepra ka shumë,këtë e dëshmojnë shtypshkronjat në çdo qytet,por lexues ka shumë pak dhe interesimi për të blerë libra ka rënë dukshëm.Interneti e bëri të veten,çka shumë njerëz,veçmas të rinj,kalojnë shumë kohë me telefon apo kompjuter.
Së shpejti do të botoj dy përmbledhje me poezi,për fëmijë e të rritur,veç jam duke pritur ndonjë donator të mundshëm.
Kosova pas 10 vjetësh do të ketë shumë libra,por lexues shumë pak.Ka humbur vullneti tek të rinjtë për të lexuar,për veç nëse obligohet.Shumica e të rinjve po lakmojnë për të shkuar në perëndim për një jetë më të mirë.
