Intervistë me poeten: Dalinë Arifi
Intervistoi për Gazetën Frymëzimi: Fatijona Bajraj
Dalina Arifi, ka lindur me 24. 03. 1993 në Prizren Shkollën fillore e përfundoi në shkollë “Zenel Hajdini” tash “Dy Dëshmorët” në fshatin Piranë, ndërsa të mesmen, në shkollën profesionale ekonomike “Ymer Prizreni” në departamentin – banka, financa e kontabilitet. Studimet i ka përfunduar për Gjuhë dhe Letërsi Shqipe në Universitetin “Ukshin Hoti” në Prizren. Me krijimtari letrare filloi të merret qysh në shkollën fillore dhe vazhdon edhe sot ku ka të numëruar shumë poezi në sirtarin e shkrimeve, duke mos lënë anash prozën e poemën. Poezitë e saj janë të botuara në shumë revista letrare si dhe nëpër antologji të ndryshme. Libri GRUA RREZE NË ERRËSIRË, është libri i saj i parë.
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
D.Arifi: Fillimet e mia të letërsisë janë nga shkolla fillore, gjegjësisht nga klasa e pestë. Ku si çdo nxënëse dhe unë kisha shumë dashuri ndaj letërsisë sepse më dukej e ëmbël e butë e dashur ashtu siç është letërsia vet.
F.Bajraj: A mendoni që e keni arritur kulmin e karrierës suaj?
D.Arifi: Jo definitivisht jam vetëm në hapat e parë të karrierës për të arritur deri tek kulmi i suksesit me duhet kohe punë dhe mund. Ka kohë.
F.Bajraj: A kujtoni ndonjë kohë kur mendoni se keni dështuar në këtë fushë?
D.Arifi: E vërteta e kësaj pyetje është që në fillimet e mia të para kur shkruaja poezi, qoftë ese dhe merrja ndonjë kritikë mendoja një gjë të tillë. Por, nga kjo kam mësuar shumë që të mos ndalem kurrë madje qëndrojë e fortë karshi kësaj fushe.
F.Bajraj: Sa e keni pas të vështirë dhe sfiduese të jeni këtu ku jeni sot?
D.Arifi: Si çdo fillestar edhe unë e kam pas shumë të vështirë. Por, dashuria ndaj letërsisë vullneti i mire dhe përkrahja familjare ma kanë shtruar rrugën me lule drejt letërsisë. Andaj jam këtu ku jam e s’tërë mbushur.
F.Bajraj: Me çka merreni jashtë kësaj, keni ndonjë profesion tjetër?
D.Arifi: Jashtë fushës së poezisë merrem dhe me studime që jam në përmbyllje në departamentin Gjuhë dhe Letërsi Shqipe. Aty ku e gjeje veten.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
D.Arifi: Për momentin nuk kam dëshirë të flas më shumë se me çka do merrem me diçka tjetër, sepse me çka na përplas jeta nuk i dihet. Por, njëherësh jam tek letërsia.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
D.Arifi: Fatkeqësisht letërsia në Kosovë nuk ka përkrahje, u mungon lexuesi. Por, si gjithmonë me shpresë se në një të ardhme të afërt rinia jonë do t’i jap jetë kësaj fushe.
F.Bajraj: Planet e juaja që do t’i realizoni së shpejti?
D.Arifi: Së shpejti plani që do realizoj do jetë dhe libri im i parë ”Grua rreze në errësirë” të cilin ia dedikoj gjinisë më të bukur asaj Femërore.
F.Bajraj: Si e shihni Kosovën pas 10 vitesh në fushën e letërsisë?
D.Arifi: Kosovën pas 10 vitesh e shoh shumë më të avansuar se sot si nga ana ekonomike, kulturore dhe nga çdo sferë tjetër, e mbi të gjitha me një rini të shkolluar, punësuar e duke lexuar sa më shumë.
