Prej ezelit belli asht ba
Udha jem e ashiknisë
Tuj m’kalitë dita ditës
Shpirtin thellë m’ka harlisë
Udha jem e gjatë
Që dyzlyk nuk njeh
M’tund mjegullnajave ama
Funin syni ma sheh
Funi i udhës tem
Asht n’nji grusht dhé
Era e t’cilin m’rri n’hunë
Për vusllat mue m’ngreh
Shtrat e jorgan mue
Ky i ziu dhé m’thotë t’bahna
Ku ka me u strehu përherë
Kur prej dynjasë t’ndahna
M’idhnohet besa dheu jem
Që shpesh di me e harru
Kur bi n’gaflet t’dynjasë
Atij selame për me i çu
Fjalë t’fundi kam heshtjen
E dheun e kam t’fundit makam
Ditës kur nji me ta do bahna
Prej tash i coj me xhan selam
