Presidentja e Kosovës, Justina Shiroka-Pula, e ka kthyer në Kuvend për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Sipas komunikatës së Presidencës, vendimi është marrë pas pranimit të propozimit zyrtar të Grupit Parlamentar të Partisë Demokratike të Kosovës (PDK), si sponsorizues i ligjit, për t’i dhënë Kuvendit mundësinë e rishqyrtimit të tij.
Në arsyetimin e vendimit, presidentja ka theksuar se rishqyrtimi duhet të përqendrohet veçanërisht në dispozitat që ndërlidhen me juridiksionin dhe mandatin e Dhomave të Specializuara, si dhe me garantimin e të drejtave kushtetuese të personave që po gjykohen në Hagë.
Në arsyetimin e saj, Shiroka-Pula ka vënë në pah sakrificën dhe kontributin e Ushtrisë Çlirimtare të Kosovës dhe të krerëve të saj në luftën për lirinë dhe pavarësinë e vendit.
Ajo ka rikujtuar gjithashtu mbështetjen për Deklaratën e Kuvendit të Kosovës të 28 shtatorit 2026, lidhur me aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Presidentja ka ritheksuar qëndrimin kundër përpjekjeve për shtrembërimin e së vërtetës historike të Kosovës dhe vënien në dyshim të karakterit çlirimtar të luftës.
Po ashtu, ajo ka kundërshtuar barazimin e popullit që luftoi për liri dhe mbijetesë me regjimin që e shtypi atë.
Në arsyetimin e vendimit, Shiroka-Pula ka bërë të ditur se ka zhvilluar dhe po vazhdon konsultimet me përfaqësues të institucioneve dhe subjekteve përkatëse shtetërore.
Sipas Presidencës, këto konsultime synojnë bashkërendimin e veprimeve ndërinstitucionale dhe diplomatike për dokumentimin, mbrojtjen dhe afirmimin e së vërtetës historike të luftës çlirimtare dhe të rolit të UÇK-së.
Një tjetër synim i këtyre konsultimeve, sipas komunikatës, është mbrojtja sa më e mirë e të drejtave dhe interesave të krerëve të UÇK-së që po gjykohen në Dhomat e Specializuara.
