Intervistë me autoren: Edona Rrustemaj Paralangaj
Intervistoi: Fatijona Bajraj
F.Bajraj: Çfarë ju frymëzoi ta shkruani librin Hija e babit?
E.Rrustemaj Paralangaj: Më frymëzoi mungesa, dashuria dhe nevoja për të gjetur përgjigje për shumë pyetje që i mbaja brenda vetes. Shkrimi u bë mënyra ime për të folur me babin dhe për të shprehur ato ndjenja që nuk mund t’i thosha me zë.
F.Bajraj: A bazohet historia në ngjarje reale apo është tërësisht trillim?
E.Rrustemaj Paralangaj: Libri është i ndërtuar mbi emocione të vërteta. Nuk do të thotë që çdo gjë është vetëm historia ime, por janë ndjenja që shumë njerëz mund t’i kenë përjetuar: mungesa, dhimbja, zhgënjimi, dashuria dhe forca për të vazhduar.
F.Bajraj: Cilat ishin sfidat më të mëdha gjatë shkrimit të këtij libri?
E.Rrustemaj Paralangaj: Sfida më e madhe ishte të përballesha me kujtimet dhe emocionet e mia. Ishte e vështirë të shkruaja për dhimbjen, por në të njëjtën kohë shkrimi më dha forcë dhe qetësi.
F.Bajraj: Sa kohë ju është dashur për ta përfunduar veprën?
E.Rrustemaj Paralangaj: Libri ka zgjatur rreth shtatë vite. Fillimisht nuk e kam nisur me idenë për të krijuar një libër, por thjesht për të shkruar për mungesën që ndjeja, mungesën e komunikimit dhe vështirësinë për t’u hapur ndaj njerëzve.
Në një fletore kërkoja të gjeja veten, dhe aty gjeta një mënyrë për të folur me babin tim. Përmes imagjinatës krijova dialogje me të dhe mora shumë përgjigje që jeta nuk ma dha mundësinë t’i dëgjoja prej tij. Me kalimin e kohës, ato shkrime u kthyen në librin “Hija e Babit”.
F.Bajraj: Si kanë reaguar lexuesit ndaj librit dhe cili koment ju ka lënë më shumë mbresa?
E.Rrustemaj Paralangaj: Lexuesit kane qene shume te dashur. Komenti që më ka prekur më shumë është kur më kanë thënë: “E gjeta veten n këtë libër” ose “Mora një përgjigje ё më ka munguar”. Shumë njerëz e kanë ndjerë sikur libri u ka dhënë fjalët që nuk kanë mundur t’i thonë vetë.
F.Bajraj: A keni në plan të shkruani një vazhdim ose një libër tjetër me tematikë të ngjashme?
E.Rrustemaj Paralangaj: Po, kam dëshirë të vazhdoj të shkruaj. Kam edhe ide për libra të tjerë, njëri për nënën dhe sakrificën e saj, sepse një nënë shpesh jep gjithçka për fëmijën e saj. Një tjetër do të trajtojë marrëdhëniet në çift, komunikimin dhe mënyrën si njerëzit mund ta kuptojnë më mirë njëri-tjetrin.
F.Bajraj: Çfarë këshille do t’u jepnit të rinjve që ëndërrojnë të bëhen shkrimtarë?
E.Rrustemaj Paralangaj: Do t’u them të mos i humbin ëndrrat e tyre. Vështirësitë mund të na ndryshojnë, por nuk duhet të na ndalin. Brenda secilit ka më shumë forcë sesa mendon. Besoni në veten tuaj dhe mos lejoni që gjykimet e të tjerëve t’ju ndalojnë.
