Intervistë me kandidatin për asamblist në Kuvendin Komunal të Kaçanikut: Jeton Luma
Intervistoi: Fatijona Bajraj
F.Bajraj: Na flisni pse zgjodhët të merreni me politikë?
J.Luma: Duke qene i ri e me plot energji e ndjej si obligim të jap sadopak kontribut nga vetja ime në politikë. Konsideroj që përveç aktivizimit shoqëror politika është njëra nga sferat që ndikon shpejt e drejtpërdrejtë në jetën tonë të përditshme. Prandaj angazhimi për mirëqenien tonë të përgjithshme dhe mendoj që së pari duhet të ndjehet si obligim.
F.Bajraj: Cilat janë tri prioritetet kryesore për të cilat do ta ngritnit zërin dhe do të angazhoheshit në Kuvendin Komunal?
J.Luma: Prioritetet kryesore do të jenë gjërat elementare të cilat shpesh po janë mungesë në vendin tonë si; uji, infrastruktura bazë e angazhimi i të rinjve në procese të rëndësishme shoqërore. Përtej këtyre do merrem edhe me çështje tjera të rëndësishme si arsimi, kultura e mundësia për të tërhequr fonde për zonat ndërkufitare prej nga edhe vij unë.
F.Bajraj: Si do të siguroheni që në punën tuaj si këshilltar i Kuvendit Komunal do të përfaqësoni interesat e të gjithë qytetarëve të komunës, jo vetëm të atyre që ju kanë votuar?
J.Luma: Angazhimi për barazi e drejtësi duhet të jenë abc e secilit prej nesh pavarësisht bindjeve tona. Me këtë qasje do funksionojmë bashkërisht.
F.Bajraj: Në cilat mënyra do të ngritni çështje për mbështetjen e të rinjve në krijimin e mundësive për punësim dhe zhvillim personal dhe profesional?
J.Luma: Duke i stimuluar ata për t’u bashkuar në nisma të rëndësishme e duke investuar në sferat të cilat i prekin direkt ato, hapja e qendrave rinore dhe jo vetëm.
F.Bajraj: A do të propozonit nisma konkrete në Kuvendin Komunal për parandalimin e largimit të të rinjve nga komuna? Nëse po, cilat?
J.Luma: Po. Investime strategjike e afatgjate të cilat do i stimulonin të rinjtë të bëhen sipërmarrës të suksesshëm.
F.Bajraj: Cilat ide do të shtyni përpara në Kuvendin Komunal për të nxitur zhvillimin ekonomik të komunës?
J.Luma: Kaçaniku duke qene qytet i cili ka reliev kryesisht malor, duhet të fokusohemi të investojmë në turizëm malor dhe si rrjedhojë e kësaj komuna do të mund të gjenroj të ardhura dhe kështu të ketë zhvillim ekonomik.
F.Bajraj: Cilat çështje do të ngrini në Kuvendin Komunal për përmirësimin e cilësisë së arsimit dhe kushteve të shkollave në komunën tuaj?
J.Luma: Arsimi së pari duhet të depolitizohet e pastaj të investohet në përmirësimin e kushteve nëpër shkolla dhe ndërtimi i fushave sportive etj.
F.Bajraj: Si do të angazhoheni në Kuvendin Komunal për të siguruar më shumë mbështetje dhe përfshirje për personat me aftësi të kufizuara në jetën publike dhe shërbimet komunale?
J.Luma: Duke i rishqyrtuar politikat që e prekin direkt këtë kategori si dhe duke i angazhuar me shumë. Ide e mirë do ishte hapja e ndonjë punëtorie për këtë kategori të veçantë. Nisma të ndryshme të cilat do vendosnin në qendër këtë kategori, psh. festivale, etj. Një zyrë e veçantë në kuadër të komunës e cila do merrej më shumë me ta dhe për t’iu dhënë qasje me të lehë në shërbime publike.
F.Bajraj: Për fund, pse mendoni se qytetarët duhet t’ju votojnë për t’i përfaqësuar në Kuvendin Komunal?
J.Luma: Si i ri me vullnet e guxim, potencial e dije që posedoj jam i bindur se mund të jap shumëçka nga vetja. Komunës tonë i duhen të rinj e të reja që guxojnë e që angazhohen për të mirën e përgjithshme. Prej të tillëve jemi, dhe me këtë qasje do të angazhohemi vazhdimisht e pa u ndalur.
