Intervistë me kandidaten për asambliste në Kuvendin Komunal të Vushtrrisë: Xheneta Sali Venhari
Intervistoi: Fatijona Bajraj
F.Bajraj: Na flisni pse zgjodhët të merreni me politikë?
Xh.Sali Venhari: Unë e zgjodha politikën sepse besoj që ndryshimi i vërtetë fillon nga përfshirja aktive e qytetarëve në vendimmarrje. Si qytetare e kësaj komune, e kam parë nga afër nevojën për një qeverisje më transparente, më të përgjegjshme dhe më afër njerëzve.
Politika për mua nuk është privilegj, por përgjegjësi për të përfaqësuar interesat e qytetarëve dhe për të ndikuar pozitivisht në jetën e tyre të përditshme.
F.Bajraj: Cilat janë tri prioritetet kryesore për të cilat do ta ngritnit zërin dhe do të angazhoheshit në Kuvendin Komunal?
Xh.Sali Venhari: Përmirësimi i kushteve në arsim dhe krijimi i mjediseve moderne shkollore më sakt të i digjitalizojmë si dhe të investojmë në krijimin e kabineteve!
Nxitja e zhvillimit ekonomik lokal, duke mbështetur bizneset e vogla dhe të mesme. Përmirësimi i infrastrukturës dhe shërbimeve publike, me fokus në lagjet dhe fshatrat që kanë mbetur pas.
F.Bajraj: Si do të siguroheni që në punën tuaj si këshilltar i Kuvendit Komunal do të përfaqësoni interesat e të gjithë qytetarëve të komunës, jo vetëm të atyre që ju kanë votuar?
Xh.Sali Venhari: Unë e shoh mandatin si një përgjegjësi ndaj gjithë qytetarëve. Do të jem gjithmonë e hapur për takime, dëgjime dhe konsultime me qytetarët, pa dallim bindjesh politike.
Përfaqësimi nuk duhet të ketë ngjyrë partiake, çdo vendim duhet të matet me interesin e përgjithshëm publik. Secili këshilltar komunal, apo siç e quajmë shpesh asambleist, në momentin kur e merr mandatin i përket qytetarëve të atij qyteti dhe jo subjektit politik. Prandaj, gjithmonë duhet të udhëhiqemi nga parimi i drejtësisë dhe kujdesit, që të mos i bëjmë padrejtësi askujt.
F.Bajraj: Në cilat mënyra do të ngritni çështje për mbështetjen e të rinjve në krijimin e mundësive për punësim dhe zhvillim personal dhe profesional?
Xh.Sali Venhari: Do të propozoj krijimin e qendrave rinore ku të rinjtë mund të marrin trajnim profesional, mbështetje për ndërmarrësi dhe aktivitete kulturore.
Po ashtu, do të bashkëpunoj me bizneset lokale për të hapur programe praktike dhe trajnime që i ndihmojnë të rinjtë të fitojnë aftësi konkrete për tregun e punës.
F.Bajraj: A do të propozonit nisma konkrete në Kuvendin Komunal për parandalimin e largimit të të rinjve nga komuna? Nëse po, cilat?
Xh.Sali Venhari: Po, megjithëse duhet theksuar se çështja e migrimit të të rinjve është kryesisht përgjegjësi e nivelit qendror, sepse lidhet me politikat e përgjithshme të punësimit, arsimit dhe zhvillimit ekonomik.
Megjithatë, edhe niveli lokal ka hapësirën e vet për të ndikuar.
Ne, si komunë, kemi buxhet të kufizuar, por kjo nuk do të thotë se nuk mund të krijojmë mundësi për të rinjtë.
Do të angazhohem për:
*Krijimin e hapësirave të posaçme për start-up-e rinore dhe nxitjen e ideve të reja për biznes.
*Mbështetje të bujqësisë moderne si një sektor ku të rinjtë mund të gjejnë punësim dhe perspektivë.
*Investime në sport, kulturë dhe teknologji, duke i dhënë të rinjve mundësi të zhvillojnë talentet dhe aftësitë e tyre në qytetin tonë.
Pra, edhe pse kompetencat tona janë të kufizuara, përmes kreativitetit dhe bashkëpunimit me nivelin qendror, donatorët dhe sektorin privat, ne mund të krijojmë një ambient më tërheqës që i mban të rinjtë afër.
F.Bajraj: Cilat ide do të shtyni përpara në Kuvendin Komunal për të nxitur zhvillimin ekonomik të komunës?
Xh.Sali Venhari: Përmirësim i infrastrukturës lokale (rrugë, ndriçim publik, ujësjellës, kanalizim) për të lehtësuar aktivitetin e bizneseve. Mbështetje për fermerët përmes subvencioneve komunale, trajnimeve dhe krijimit të tregjeve lokale për shitjen e produkteve të tyre.
Nxitja e turizmit lokal përmes promovimit të monumenteve historike, trashëgimisë kulturore dhe turizmit rural. Bashkëpunim i komunës me bizneset vendore për të organizuar panaire, ekspozita dhe aktivitete që promovojnë produktet lokale dhe u japin treg më të madh.
F.Bajraj: Cilat çështje do të ngrini në Kuvendin Komunal për përmirësimin e cilësisë së arsimit dhe kushteve të shkollave në komunën tuaj?
Xh.Sali Venhari: Do të shtyj përpara modernizimin e shkollave me pajisje teknologjike si smart tabela, laboratorë për shkencë dhe informatikë, si dhe krijimin e sallave sportive funksionale në çdo shkollë. Po ashtu, do të punoj për përmirësimin e infrastrukturës shkollore duke përfshirë ngrohjen, dritaret, ujin e pijshëm dhe hapësirat sanitare sepse këto janë nevoja bazike për një mësim cilësor.
Një fokus i veçantë do të jetë edhe përkrahja e mësimdhënësve përmes trajnimeve të vazhdueshme që ata të jenë të përgatitur për metodat më bashkëkohore të mësimdhënies. Qëllimi im është të krijojmë kushte ku fëmijët tanë të mësojnë në një mjedis të dinjitetshëm dhe bashkëkohor. Këto nisma tashmë kanë filluar nga kryetari aktual, prandaj unë do të vazhdoj t’i shtyj përpara me përkushtim dhe, me ndihmën e tij, do të punojmë që çdo shkollë në komunën tonë të ketë kushtet që fëmijët meritojnë.
F.Bajraj: Si do të angazhoheni në Kuvendin Komunal për të siguruar më shumë mbështetje dhe përfshirje për personat me aftësi të kufizuara në jetën publike dhe shërbimet komunale?
Xh.Sali Venhari: Do të propozoj rregullimin e infrastrukturës për qasje të barabartë si shkallë, rampa, ashensorë dhe hapësira të përshtatura në institucione publike, shkolla dhe qendra shëndetësore. Komuna mund të krijojë edhe programe për mbështetje në arsimim dhe përfshirje në aktivitete publike, kulturore e sportive, në mënyrë që personat me aftësi të kufizuara të ndihen pjesë aktive e shoqërisë.
Edhe pse shërbimet sociale janë përgjegjësi kryesisht e nivelit qendror, ne si komunë do të kemi rol ndërmjetësues, duke bashkëpunuar me qeverinë qendrore dhe organizatat e specializuara për të sjellë projekte dhe mbështetje konkrete për këta qytetarë. Një iniciativë tjetër që do të propozoj është krijimi i një Këshilli Komunal për Personat me Aftësi të Kufizuara, që do të shërbente si zë i drejtpërdrejtë i tyre në vendimmarrje dhe do të ndihmonte në monitorimin e projekteve dhe shërbimeve që ndikojnë në jetën e tyre.
F.Bajraj: Për fund, pse mendoni se qytetarët duhet t’ju votojnë për t’i përfaqësuar në Kuvendin Komunal?
Xh.Sali Venhari: Qytetarët duhet të më votojnë sepse unë vij me përkushtim, integritet dhe përvojë në shërbim të komunitetit. Kam një vizion të qartë për zhvillimin e komunës, duke u fokusuar tek arsimi, ekonomia lokale, infrastruktura dhe mirëqenia e qytetarëve. Përvoja ime si mësuese dhe punët e përditshme me nxënës dhe prindër më kanë mësuar si të dëgjoj nevojat reale të komunitetit, si t’i udhëheq iniciativat për të përmirësuar mjedisin arsimor dhe si të bashkëpunoj me çdo qytetar.
Jam e gatshme të punoj me transparencë, të dëgjoj çdo qytetar dhe të jem zëri i tyre i sinqertë në Kuvend, pa dallime politike. Përveç dëshirës për të dëgjuar, unë kam edhe plan konkret veprimi, që do të shndërrohet në rezultate të prekshme: përmirësim të kushteve në shkolla, mbështetje për të rinjtë, zhvillim të bizneseve vendore dhe përfshirje më të madhe të personave me nevoja të veçanta.
Qytetarët duhet të më votojnë sepse unë nuk e shoh këtë mandat thjesht si detyrë politike, por si përgjegjësi të drejtpërdrejtë ndaj tyre, për të punuar për çdo qytetar, duke përdorur përvojën time në arsim dhe angazhimin tim të përditshëm me njerëzit për të sjellë ndryshime konkrete dhe pozitive në komunitetin tonë.
Do jem zëri i fuqishëm i tyre në Kuvend!
