Intervistë me fotografen: Kosovare Ramadani Mehmeti
Intervistoi: Fatijona Bajraj
F.Bajraj: Ç’do të thotë profesioni i fotografit për ty?
K.Ramadani Mehmeti: Për mua, profesioni i fotografit do të thotë që përmes një shkrepje nga duart tua ta përjetësosh një moment të rëndësishëm të jetës. Përmes syrit të kamerës mund ta bëjmë që një moment i caktuar të mbahet mend përgjithmonë.
F.Bajraj: A është profesioni i fotografit për ty profesion a pasion?
K.Ramadani Mehmeti: Në fillimet e mia, të fotografoja ishte vetëm një pasion dhe një ëndërr që ta kisha një aparat fotografik profesional. Tani kur kam aparatin, pasioni im ka filluar të shndërrohet edhe në profesion. Tani, kam balancën mes të dyjave, pasion dhe profesion në të njëjtën kohë.
F.Bajraj: Çka nëse jo fotograf?
K.Ramadani Mehmeti: Dëshira ime primare ka qenë të bëhem ushtare e Kosovës, por pasi kjo ëndërr nuk u realizua, fillova që t’i realizoj ëndrrat e tjera. Përveç profesionit të fotografes, unë kam të përfunduara studimet për letërsi shqipe, dhe herë pas here punoj edhe në rolin e lektores dhe redaktores së librave, po ashtu edhe projekte që kanë të bëjnë me leximin dhe librin në përgjithësi.
F.Bajraj: Kur e keni vërejtur pasionin tënd për fotografinë?
K.Ramadani Mehmeti: Pasionin tim për fotografinë e kam vërejtur që në moshë të re, prej atëherë kur më ka rënë në dorë ndonjë mjet fotografik, qoftë aparat, apo së fundi edhe telefona me kamerë.
F.Bajraj: Cili është rrugëtimi yt në botën e fotografisë?
K.Ramadani Mehmeti: Kur kam filluar të bëj fotografi, zakonisht kam fotografuar natyrën, lulet apo edhe lindjet dhe perëndimet e diellit. Pasi që bëja shumë fotografi çdo ditë, rrethi dhe shoqëria filluan ta vërenin talentin tim, me ç’rast fillova dhe t’i postoja në rrjetet sociale. Më vonë fillova të marrë pjesë edhe nëpër konkurse të fotografisë, ku fotografitë e mia u vlerësuan edhe nga juria profesionale, të cilat më dhanë shtysë që të vazhdoj këtë rrugëtim.
F.Bajraj: Cilën e konsideroni arritjen tënde më të madhe dhe cili është targeti yt për të ardhmen?
K.Ramadani Mehmeti: Arritjen time më të madhe deri më tani e konsideroj shndërrimin e pasionit tim në profesion. Po ashtu, e konsideroj si të arritur vlerësimin e vazhdueshëm që e marrë nga publiku dhe klientët. Targeti im për të ardhmen është zgjerimi i biznesit dhe blerja e pajisjeve të reja, të cilat do të ofronin fotografi më cilësore.
F.Bajraj: Sa kohë të duhet zakonisht për të kapur një fotografi të përsosur?
K.Ramadani Mehmeti: Për të realizuar një fotografi të përsosur nuk është gjithmonë në pyetje se sa kohë do të duhet, mjafton të kapësh çastin e duhur dhe këndin e duhur.
F.Bajraj: Cila ka qenë fotografia më sfiduese që ke realizuar dhe pse?
K.Ramadani Mehmeti: Me fotografitë që merrem unë, nuk ka shumë sfida në realizimin e tyre, por mund ta ceki fotografinë e Sahat Kullës në Skenderaj me Flamurin e Republikës së Kosovës. Kjo fotografi ishte më sfiduese pasi që duhej të prisja momentin e valëvitjes së flamurit në këndin që më përshtatej.
F.Bajraj: Cila është fusha që e ke më për zemër për ta fotografuar?
K.Ramadani Mehmeti: Pasi që shpesh dal nëpër malet e Kosovës, bukuria e tyre më tërheq që ta dua edhe më shumë natyrën dhe të realizoj edhe fotografi pa fund.
F.Bajraj: Çfarë këshille do t’i jepje një fotografi të ri që dëshiron të merret me fotografinë?
K.Ramadani Mehmeti: Fotografia është ajo që i përjetëson momentet dhe kujtimet i bën të paharrueshme. Padyshim që ky profesion është art në vete dhe nëse do të merresh me të duhet edhe ta duash.
F.Bajraj: Cilat janë planet apo projektet e tua të ardhshme?
K.Ramadani Mehmeti: Planet e mia për të ardhmen janë zgjerimi i biznesit, për të arritur një nivel më të lartë në profesion dhe paraqitja e bukurive të Kosovës përmes fotografisë për ta plotësuar vetveten dhe pasionin tim.
