Presidentja e Republikës së Kosovës, Vjosa Osmani, ka pritur në takim Ambasadorin e Mbretërisë së Bashkuar në Kosovë, Jonathan Hargreaves, me të cilin ka biseduar për situatën politike të krijuar nga moskonstituimi i Kuvendit dhe për marrëdhëniet bilaterale ndërmjet dy vendeve.
Sipas njoftimit të Presidencës, gjatë takimit është theksuar rëndësia e vazhdimit të bashkëpunimit të ngushtë në fusha me interes të përbashkët si mbrojtja, sundimi i ligjit dhe zhvillimi ekonomik. Presidentja Osmani nënvizoi nevojën për thellimin e partneritetit strategjik mes Kosovës dhe Mbretërisë së Bashkuar, veçanërisht në fushën e mbrojtjes dhe sigurisë, si garanci për paqen dhe stabilitetin në vend dhe në rajon.
Ajo gjithashtu shprehu mirënjohje për mbështetjen e vazhdueshme të Mbretërisë së Bashkuar në forcimin e institucioneve demokratike të Kosovës, duke e cilësuar këtë shtet si një partner strategjik të rëndësishëm për Kosovën.
