Intervistë me poetin: Ilir Çerkini
Intervistoi: Fatijona Bajraj
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi? Pse bash poezia?
I.Çerkini: Qysh moti, mbase prej kohës së studimeve, e mbaj mend që kam pas një lidhje të fshehtë me poezinë, por nuk e kam treguar askujt. Ajo ka qenë si një shpellë brenda meje, një vend ku vetëm unë kisha qasje – në ditët kur ndihesha tejet mirë apo shumë i mërzitur. Zgjodha poezinë sepse ndjenjat, sipas meje, thuhen ndryshe përmes saj.
F.Bajraj: A mendoni që e keni arritur kulmin e karrierës suaj?
I.Çerkini: Jo, nuk mendoj se e kam arritur kulmin. Madje mendoj se sa kam filluar – ende rritem, ende mësoj çdo ditë.
F.Bajraj: A kujtoni ndonjë kohë kur mendoni se keni dështuar në këtë fushë?
I.Çerkini: Po, madje shumë herë. Por dashuria e atyre që kanë kërkuar poezitë dhe shkrimet e mia më ka bërë të vazhdoj tutje. Ka pas raste kur kam shkruar vetëm sepse të tjerët e kërkonin – dhe kjo dashuri e tyre më ka shty përpara.
F.Bajraj: Sa e keni pas të vështirë dhe sfiduese të jeni këtu ku jeni sot?
I.Çerkini: Nuk mendoj se kam arritur diçka të madhe, por përmes kësaj rruge kam njohur shumë njerëz të mirë, që e kanë vlerësuar shkrimin tim dhe që ia kanë hapur dyert librit tim. Kjo për mua ka vlerë të madhe.
F.Bajraj: Me çka merreni jashtë kësaj, keni ndonjë profesion tjetër?
I.Çerkini: Po, merrem edhe me punë të tjera për të jetuar mirë – në kuptimin që t’ia plotësoj vetes kërkesat e përditshme. Por poezia mbetet ajo pjesë që ma plotëson më së shumti shpirtin.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
I.Çerkini: Nuk i dihet kurrë jetës. Jam njeri që më pëlqen me provu gjëra të reja. Ndoshta, po gjithmonë duke e ruajtur lidhjen me fjalën.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
I.Çerkini: Ka shumë talent, por mungon përkrahja. Shkrimtarët e rinj shpesh harrohen ose nuk vlerësohen sa duhet. Ka nevojë për më shumë hapësirë dhe mbështetje.
F.Bajraj: Planet e juaja që do t’i realizoni së shpejti?
I.Çerkini: Jam duke përgatitur librin tim të dytë dhe dua t’i sjell lexuesit diçka më të thellë, më të ndjerë. Por sa do të zgjasë kjo, mos më pyet… Kohët e fundit nuk është se kam edhe aq shumë kohë.
F.Bajraj: Si e shihni Kosovën pas 10 vitesh në fushën e letërsisë?
I.Çerkini: Të them të drejtën, nuk kam koment për këtë pyetje. Tani po jetoj jashtë Kosovës dhe nuk po ec më në hap me zhvillimet letrare që ndodhin atje.
