Dështoi edhe vazhdimi i sotëm i seancës, përpjekja e 19-të me radhë për konstituim të këtij institucioni ligjvënës, raporton Ekonomia Online.
Asgjë e re: përsëri tentim i Lëvizjes Vetëvendosje për krijimin e një komisioni ad-hoc për votim të fshehtë.
Kryesuesi Avni Dehari kërkoi nga PDK-ja, LDK-ja, AAK-ja dhe Lista Serbe që të bëjnë propozimet e kandidatëve të tyre për komision, por këto parti nuk pranuan dhe nuk morën pjesë në votim.
Ishin 54 vota për, një kundër dhe asnjë abstenim.
Dehari bëri të ditur se seanca ndërprehet dhe se do të vazhdojë më 23 maj, në orën 11:00.
Haxhiu: Vetëvendosje është e qartë se çka do, nuk është e qartë se çka do opozita
As sot kryeministri në detyrë, Albin Kurti, nuk dha deklaratë para mediave. Por, e propozuara e Vetëvendosjes për kryetare të Kuvendit të Kosovës, Albulena Haxhiu, tha se Vetëvendosje është e vendosur për konstituimin e Kuvendit dhe formimin e qeverisë, duke theksuar se i takon kësaj partie të propozojë kryetarin e Kuvendit, raporton Ekonomia Online.
Ajo kritikoi opozitën për mungesë qëndrimi të qartë. Sipas saj, opozita nuk e është e qartë se çka do.
“Nuk po propozohet kandidati për kryetar të Kuvendit, por komisioni për votim të fshehtë.
Për Lëvizjen Vetëvendosje është e qartë se çka do, do që të konstituohet Kuvendi dhe të vazhdojmë me hapa të tjerë për formimin e qeverisë, pastaj janë 15 ditë që të votohet qeveria.
Nuk është e qartë se çka do opozita, kanë qëndrime të ndryshme është e qartë që kanë preferenca ne bazohemi në të drejtat kushtetuese.
I takon VV-së për propozimin e kryetarit të kuvendit. Qytetarët presin nga ne ta konstituojmë Kuvendin dhe ta formojmë qeverinë. Nuk jemi këtu për të pëlqyer njëri-tjetrin, por për të vepruar sipas Kushtetutës.
Situata është e qartë. Qëndrimi i Vetëvendosjes dihet. Ka tashmë plan për të penguar konstituimin e Kuvendit, por mendoj se është vendim i gabuar. Qytetarët presin nga ne ta konstituojmë Kuvendin e ta formojmë qeverinë”, tha Haxhiu.
Çitaku: Thirrje deputetit Kurti të reflektojë, ta ndërrojë kandidaten
Deputetja e PDK-së, Vlora Çitaku, tha se kryetari i Vetëvendosjes, Albin Kurti, duhet të reflektojë dhe ta ndërrojë kandidaten për kryeparlamentare, raporton Ekonomia Online.
“I bëjmë thirrje deputetit Kurtit të reflektojë, të zhbllokojë situatën, ta ndërrojë kandidaten, në mënyrë që institucionet të konstituohen.
PDK-ja ka qenë e përgjegjshme dhe konstruktive gjatë gjithë kësaj periudhe. Do të mundohemi me çdo gjë për ta zhbllokuar situatën”, tha Çitaku.
Ajo nuk komentoi deklaratat e Kurtit në intervistën e mbrëmshme në RTK.
Kica-Xhelili: Marrëveshja politike e domosdoshme për formimin e institucioneve, VV mban përgjegjësinë
Deputetja e LDK-së, Doarsa Kica Xhelili, tha se një marrëveshje politike është e domosdoshme për formimin e institucioneve të reja dhe theksoi se përgjegjësia bie mbi Lëvizjen Vetëvendosje, raporton Ekonomia Online.
“Nuk mund të bëhet asnjëherë kryetari i Kuvendit pa marrëveshje politike, sepse kërkohen 61 deputetë që asnjëherë nuk i kanë takuar një partie politike si tërësi. Nëse jo me partitë tjera, është dashur të bëhet marrëveshje me partitë minoritare, sepse janë edhe nënkryetarët e tyre.
Ne nuk jemi të obliguar ta votojmë një person, në mendësinë antikushtetuese të të cilit ne nuk e gjejmë veten.
Sa i përket prononcimeve të deputetit Kurti, nuk vlerësoj që as kam nevojë më të komentojë, për faktin që ne kemi parashtruar kallëzim penal ndaj tij, sepse mënyra se si ai vazhdon të shkojë në qeveri, t’i shfrytëzojë mjetet e qeverisë, të marrë vendime të kundërligjshme, e bën ploitësisht të padenjë që ta komentojë”, tha ajo.
Haradinaj: Po sjellin njerëz nga Maqedonia për ta bindur deputetin Adem Hoxha që të votojë për Vetëvendosjen
Kryetari i AAK-së, Ramush Haradinaj, tha se partia e tij ka ofruar zgjidhje për të shmangur bllokimin e Kuvendit, duke u shprehur e gatshme të votojë një kandidat konsensual që në seancën e parë, raporton Ekonomia Online.
Ai theksoi se vonesat po e dëmtojnë Kosovën, duke e akuzuar kryeministrin në detyrë Albin Kurti.
“Është duke e torturuar Kosovën kuptohet për të vazhduar të mbesë edhe deputet, edhe kryetar qeverie jashtëligjshëm. Vetëvendosje e ka kaluar pragun, falë listës Guxo e Alternativës edhe kjo e jona ashtu është. Pa Alternativën e Listën Guxo, as Vetëvendosje s’do ta kalonte pragun”, tha Haradinaj.
Ai ka akuzuar Lëvizjen Vetëvendosje se po sjell njerëz nga Maqedonia e Veriut, me dhjetëra persona të afërt me koalicionin VLEN për ta bindur deputetin goran Adem Hoxha që të japë votën për Vetëvendosjen.
“Me kërkesë të Albinit. Ky është Albini. Qeveria atje nuk ka qenë aq miqësore ndaj shumë vlerave. Po shihet që e kanë një kuzhinë”, shtoi Haradinaj, duke përmendur zëvendëskryeministrin e Maqedonisë së Veriut, Izet Mexhiti, si njërin prej këtyre personave.
