Me Shkëndijen kampione dhe pozitat evropiane që kanë siguruar Sileksi dhe Rabotniçki, dy javët e fundit të Ligës së Parë të Maqedonisë së Veriut, do të zhvillohen pa shumë dramë, njofton Telegrafi.
Kampionati i Maqedonisë së Veriut në futboll po hyn në fazën përmbyllëse, me javën e 32-të që do të luhet të dielën më 11 maj, duke nisur në orën 17:00. Këto dy javë të fundit priten të jenë pa shumë dramë, pasi që tashmë janë konfirmuar emrat e ekipeve që kanë arritur objektivat kryesore të sezonit.
Shkëndija është kurorëzuar kampione dhe do të përfaqësojë vendin në arenën evropiane, ndërsa Sileksi dhe Rabotniçki kanë siguruar pozitat e dyta dhe të treta, që gjithashtu çojnë në garat ndërkombëtare në kualifikimet e Ligës së Konferencës. Në fundin e tabelës, Besa nga Dobërdoli duket e destinuar të luajë ndeshjen e balotazhit për mbijetesë, pasi që situata për ta është bërë e vështirë dhe shpresat janë minimale për shpëtim direkt.
Turbulencat e javëve të fundit, me tërheqjen e Voska Sport dhe Gostivarit, kanë ndikuar në rrjedhën e kampionatit, duke bërë që disa ndeshje të regjistrohen me rezultat zyrtar. Në këtë javë, dy sfida do të mbyllen në tavolinë: Gostivari – Shkëndija dhe Besa – Voska Sport.
Ndërkohë, në fushë do të luhen katër duele: Shkupi – Tikveshi, Struga – AP Brera, Rabotniçki – Vardari dhe Sileksi – Pelisteri.
Futbolldashësit do të kenë rastin të shohin përballje kryesisht për prestigj dhe për mbylljen me dinjitet të një sezoni, i cili pavarësisht luhatjeve, solli emocione dhe në fund.
