Kombëtarja e Kosovës në futboll, U16, ka triumfuar edhe në ndeshjen e dytë në turneun e UEFA Development Tournament që po mbahet në Shqipëri.
Dardanët e rinj pasi deklasuan San Marino-n (7-0), sot e kanë mundur edhe Andorrën, me rezultat 2-1.
Të besuarit e Mehmet Kurdës është në duel me Andorrën treguan performancë mjaft të mirë duke arritur fitoren e dytë në turneun zhvillimor të UEFA-së.
Heroi i kësaj sfide ishte Unejs Mustafa, i cili realizoi të dy golat për Dardanët e rinj. Ai kaloi Kosovën në epërsi në minutën e 40-të, ndërsa e dyfishoi epërsinë në fillim të pjesës së dytë (48’), kur shënoi edhe golin e dytë personal dhe të ekipit, duke i siguruar Kosovës epërsinë e nevojshme për fitore.
Pas ndeshjes, Mustafa u shpreh i lumtur për golat dhe fitoren. “Jam shumë i lumtur që i kam dhënë dy gola. Është fitorja e dytë me Kombëtaren e Kosovës dhe shpresoj të ecim kështu. Besoj se edhe në ndeshjen e tretë kundër Shqipërisë do të arrijmë sukses”, tha Mustafa.
Në minutat e fundit të ndeshjes, Andorra arriti të shënojë një gol për ta ngushtuar rezultatin në 2:1, por pa arritur të rrezikojë seriozisht fitoren e Kosovës.
Trajneri Mehmed Kurda u shpreh i kënaqur me angazhimin dhe karakterin e treguar nga lojtarët e tij.
“Edhe sot djemtë treguan një karakter të fortë. Edhe pse patëm një kundërshtar jashtëzakonisht të fortë dhe të papërshtatshëm, ia arritëm të fitojmë 2:1. I përgëzoj djemtë për përkushtimin dhe paraqitjen dinjitoze në këtë turne”, theksoi Kurda.
Ndeshjen e fundit në këtë turne zhvillimor, Kosova U16 do ta luajë më 25 prill kundër Shqipërisë, ku synon ta mbyllë me sukses të plotë këtë paraqitje të shkëlqyer.
