Marrëveshja në vlerë prej pesë milionë eurove për ndërtimin e një impianti modern për trajtimin e ujërave të zeza është nënshkruar të hënën midis ministrit në detyrë të Financave, Punës dhe Transfereve, Hekuran Murati dhe drejtorit të Bankës Evropiane për Rindërtim dhe Zhvillim, Sergiy Maslichenko e përfaqësuesit të Kompanisë Rajonale të Ujësjellësit “Mitrovica”, Bashkim Kurti.
Sipas njoftimit të ministrisw, ky grant është pjesë e projektit për zhvillimin e infrastrukturës së ujërave të zeza në rajonin e Mitrovicës, dhe parasheh ndërtimin e një impianti modern për trajtimin e ujërave të zeza, si dhe rehabilitimin dhe zgjerimin e rrjetit ekzistues në komunat e Mitrovicës dhe Vushtrrisë, përfshirë edhe zonat përreth.
Projekti, siç thuhet, do të përmirësojë ndjeshëm kushtet e jetesës për rreth 123,000 banorë të kësaj zone.
“Duke reduktuar ndjeshëm ndotjen mjedisore dhe duke kontribuar në mbrojtjen e burimeve ujore lokale nga shkarkimet e ujërave të zeza të patrajtuara. Deri më tani, vlera totale e financimit për këtë projekt arrin në rreth 38 milionë euro, ku granti prej 5 milionë euro është siguruar si rezultat i aplikimit të suksesshëm të Kosovës në Kornizën e Investimeve për Ballkanin Perëndimor. Kjo marrëveshje është dëshmi e përkushtimit për zhvillim të qëndrueshëm, mbrojtje të mjedisit dhe garantim të shërbimeve cilësore për qytetarët”, thuhet në njoftimin e Ministrisw të Financave, Punës dhe Transfereve.
