Derisa në Kosovë ndër qytetarë dhe biznese në Kosovë sa vjen e shtohet pakënaqësia pas paralajmërimit për shtrenjtimin e energjisë elektrike 15 për qind, Zyra e Rregullatorit për Energji bëri publike përkrahjen që e mori nga Sekretariati i Komunitetit të Energjisë me seli në Vjenë, raporton Ekonomia Online.
“Sekretariati i Komunitetit të Energjisë me seli në Vjenë ka shprehur mbështetjen e tij për veprimet e Bordit të Zyrës së Rregullatorit për Energji (ZRRE) në këtë proces tarifor. Në një letër zyrtare të dërguar sot, Sekretariati ka theksuar rëndësinë e transparencës dhe pavarësisë në vendimmarrjen rregullatore, si elemente kyçe për një treg energjetik të drejtë dhe të qëndrueshëm.
Gjithashtu, është theksuar se përcaktimi i tarifave në mënyrë të drejtë dhe të bazuar në kosto reflektive është thelbësor për sigurinë afatgjatë të sektorit të energjisë dhe mbrojtjen e konsumatorëve.
Sekretariati inkurajon të gjitha palët e interesuara të marrin pjesë në një konsultim konstruktiv me ZRRE-në, në përputhje me parimet e legjislacionit evropian”, thuhet në njoftimin e ZRRE-së për mbështetjen që e mori nga Sekretariati i Komunitetit të Energjisë me seli në Vjenë.
Nga ana tjetër, pasnesër në Prishtinë do të mbahet protestë e qytetarëve kundër shtrenjtimit të energjisë elektrike.
