Intervistë me poetin: Myzafer Ejupi
Intervistoi: Fatijona Bajraj
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi? Pse bash poezia?
M.Ejupi: Poezia më ka tërhequr gjithmonë, zhanri im duket i thellë me plot vuajtje dhe trishtim, një dashuri e humbur apo një dashuri e pamundur, mendoj se përmes poezisë arrijmë të shkarkojmë apo derdhim të gjithë ndjenjat dhe emocionet tona që nuk mund ti shprehim me fjalë, apo edhe të godasim në zemrat më të forta dhe lënduara. Ndërsa vitet kalonin, ndoshta ka 10 vite që shkruaj, por tani së fundmi, ka ndoshta 2 vite që kam filluar të publikoj punën time dhe ta marr seriozisht këtë talent, ndoshta është dashur edhe më herët të paqaqes shkrimet e mia, por kurrë nuk është vonë për punë të mira!
F.Bajraj: A mendoni që e keni arritur kulmin e karrierës suaj?
M.Ejupi: Sinqerisht jo, nuk ngopem lehtë me sukseset e arritura në karrierën time, sigurisht që kam filluar që moti të shkruaj, por duke qenë se vonë jam aktivizuar në Grupe Letrare dhe botimin e poezive, mund te them që karriera ime tani sa ka filluar, ndoshta mund të përmbushëm me botimin e një libri jashtë poezive, kjo mendoj se do ta fuqizoj karrierën time.
F.Bajraj: A kujtoni ndonjë kohë kur mendoni se keni dështuar në këtë fushë?
M.Ejupi: Sigurisht që po, disa herë kam menduar të mos merrem me shkrime dhe poezi, duke qenë se jetojmë në një shoqëri tejet materialiste, ka patur raste kur kam menduar të tërhiqem, por e kam kuptuar se jam i dhënë pas shkrimeve dhe kam imagjinatë më shumë se tjerët, bota e autorëve dallon shumë nga bota e njerëzve tjerë normal, sigurisht që has në paragjykime apo kritika të pa baza, por nëse do të ndjekësh ëndrrën tënde duhet të mos kesh komplekse dhe të bësh kompromis me veten, do t’ja dalësh.
F.Bajraj: Sa e keni pas të vështirë dhe sfiduese të jeni këtu ku jeni sot?
M.Ejupi: Fillimi ka qenë i vështirë, kam hasur në kritika të pa vend dhe habi të njerëzve, njerëzit paragjykojnë dhe nuk e kanë idenë se çfarë ndjenje kënaqësie është kur ti krijon diçka të bukur që tjerët e gjejnë një pjesë të jetës apo vetes në të. Por si çdo fillim, patjetër që dikush do të të mbështes emocionalisht pa kushte dhe do të motivojë të ecësh para, dhe në rastin tim në fillimet e mia kam takuar një person, një mike shumë të veçantë për mua që më ka mbështetur dhe inkurajuar të shkruaj dhe mos të ndalem, dhe padyshim që pa përkrahjen e saj sot nuk do isha këtu ku jam, pastaj me kalimin e kohës njerëzit fillojnë të të njohin më mirë dhe realisht vlerësojnë talentin tënd. F.Bajraj: Me çka merreni jashtë kësaj, keni ndonjë profesion tjetër?
M.Ejupi: Jashtë poezive si profesion të dytë do të thoja merrem me shitje, kryesisht jam specialist i shitjeve online dhe punoj në një kompani të huaj Amerikane “ASOS” në Gjuhën Angleze. Kam studjuar Gjuhën Angleze, po ashtu jam i certifikuar në të gjitha nivelet në “Oxford Studio” dhe “FINCH” në Prizren. Jam i çertifikuar edhe në Shkollën Amerikane për Studime Europiane “Wilson School” në Tiranë në degën e Mardhenieve Nderkombtare.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
M.Ejupi: Nuk e di, për momentin jam i fokusuar tek poezitë deri në botimin e tyre në bashkëpunim me Shtëpinë Botuese “Frymëzimi”, personalisht më duhet të ju falënderoj edhe juve për mbështetjen dhe botimin e poezive të mia në Revistën Letrare “Uji”, nuk kam ndonjë plan për diçka tjetër por kam filluar të shkruaj një libër jashtë poezive dhe besoj se do jetë një befasi e madhe për lexuesit, nuk e përjashtoj mundësinë që në një kohë mund të ndryshoj edhe zhanër letrar por jo tani.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
M.Ejupi: Letërsia tek ne nuk vlerësohet sa duhet, tekst shkrues apo këngëtarë të kohës së sotme na e kanë bastarduar dhe masakruar gjuhën tonë dhe letërsinë tonë, fjalët e huaja na kanë zënë vend në gjuhën tonë të përditshme, dhe mendoj se nuk po vlerësohet dhe lexohet sa duhet fatkeqësisht.
F.Bajraj: Planet e juaja që do t’i realizoni së shpejti?
M.Ejupi: Si plan të radhës mendoj se është botimi i librit tim të parë me poezi, kjo ka rëndësi tani për tani për mua, pastaj edhe një libër tjetër i një natyre tjetër është rrugës për finalizim.
F.Bajraj: Si e shihni Kosovën pas 10 vitesh në fushën e letërsisë?
M.Ejupi: Duke qenë se rrjetet sociale kanë depërtuar shpejt në shoqërinë tonë letërsia jonë fatkeqësisht po shuhet apo është e vakët, nuk e di, ajo çfarë shoh sot realisht nuk më pëlqen dhe tremb për 10 vitet e ardhshme, shpresoj ta kem gabim por gjeneratat aktuale nuk lexojnë dhe nuk janë të aftë mjaftueshëm të krijojnë diçka vetë, pra rrjetet sociale ua kanë vjedhur imagjinatën krijuese dhe shpresoj që rinia jonë të vlerësoj sa më shumë letërsinë tonë.
