Kombëtarja e Kosovës në futboll, sonte në ‘Fadil Vokrri’ do të përballet me Islandën.
Dardanët dhe islandezët do të ballafaqohen në ndeshjen e parë të ‘Play-off-it’ në Ligën e Kombeve, ndeshje që do të transmetohet drejtpërdrejt në RTK.
Kjo sfidë e cila parashikohet të luhet në një atmosferë fantastike në ‘Fadil Vokrri’, është duel tejet i rëndësishëm për të dy kombëtaret në garën për promovim në Ligën B të Ligës së Kombeve.
Përzgjedhësi i Kombëtares së Kosovës në futboll, Franco Foda, është shprehur i bindur se të besuarit e tij, do të bëjnë paraqitje të mirë në duel me Islandën.
“Atmosfera në skuadër është e mirë. Amir Rrahmani dhe Valon Berisha dje kanë stërvitur të diferencuar nga grupi, por shpresojmë se do të jenë të gatshëm për nesër. Islanda ka lojtar individualisht, por ne do të bëjmë lojën tonë. Duhet të kemi shpirt luftarak në këto dy ndeshje”, ka thënë Foda.
Duelit mes Dardanëve dhe islandezëve, i paraprinë emisioni ‘Dardanët’ në RTK, emision në të cilin analizohet forma e lojtarëve të ftuar, përzgjedhja e selektorit Franco Foda për këto duele, dallimi i kombëtareve, ballafaqimet e ndërsjella si dhe ecuria e deritanishme e Kombëtares së Kosovës.
Në panel do të jenë opinionistët Ramiz Krasniqi dhe Malsor Gjonbalaj. Menjëherë pas ndeshjes emisioni vazhdon me pjesën përmbyllëse përfshirë prononcimet e lojtarëve dhe selektorit por edhe detajet tjera kryesore nga ndeshja dhe pritshmëritë për duelin e së dielës ndaj të njëjtit rival të cilin RTK po ashtu do ta transmetoj drejtpërdrejt.
Emisioni ‘Dardanët’ fillon nga ora 20:05, kurse, ndeshja mes Kosovës dhe Islandës starton në orën 20:45.
