BB Green Kosova ka mbajtur trajnim për Gazetari të Gjelbër me temën “Si të raportohet për mjedisin, pyjet dhe ndryshimet klimatike”, ku morën pjesë gazetarë, ekspertë dhe përfaqësues të institucioneve ndërkombëtare, raporton Ekonomia Online.
Ky aktivitet synon të forcojë gazetarinë mjedisore në Kosovë dhe të nxisë raportimin e çështjeve që lidhen me pyjet, ndotjen dhe ndryshimet klimatike.
Aivo Orav, ambasador i BE-së në Kosovë, theksoi rëndësinë e mediave në krijimin e fuqisë mjedisore dhe mbështetjen e sistemeve të qëndrueshme.
Ai shtoi se raportimi i fortë dhe investigativ është kyç për të parandaluar keqkuptimet dhe shpërfilljen e këtyre çështjeve.
“Media ka një rol të rëndësishëm në krijimin e fuqisë mjedisore, në mbajtjen e sistemeve të qëndrueshme dhe në ndikimin te politikat që prekin mjedisin tonë, ambientin tonë dhe, në fund, të ardhmen tonë. Në punën tuaj, gazetarët nuk janë vetëm prodhues të informacionit, por edhe agjentë ndryshimi, përgjegjshmërie dhe veprimi. Ndikimi i gazetarëve në këtë proces është kritik. Pa një raportim të fortë, të informuar dhe investigativ për mjedisin, këto çështje mund të mbeten të paqarta ose të keqkuptuara.
Ne gjithashtu inkurajojmë fuqimisht gazetarët e rinj të eksplorojnë këtë fushë kaq të rëndësishme. E ardhmja e gazetarisë kritike lidhet me ata që janë të gatshëm të mësojnë, të eksperimentojnë dhe të sfidojnë status quo-n. Perspektivat tuaja të reja dhe përpjekjet tuaja mund të ndihmojnë në formësimin e mënyrës se si Kosova dhe bota do të vazhdojnë t’i përgjigjen sfidave mjedisore, me të cilat përballemi sot. Prandaj, çështjet mjedisore duhen të jenë në krye të axhendës sonë. Ato nuk janë opsionale, ato janë të domosdoshme. Puna juaj ka fuqinë të sjellë ndryshime të vërteta, duke siguruar që mjedisi, komuniteti dhe klima të marrin vëmendjen dhe mbrojtjen që u nevojitet në mënyrë të plotë dhe të drejtë”, ka thënë ambasadori Orav.
Jonas Westerlund, ambasador i Suedisë në Kosovë, ngriti shqetësimin për shkatërrimin e pyjeve në Kosovë, duke theksuar se prerjet e paligjshme janë të pranishme kudo.
“Pyjet përballen gjithashtu me kërcënime në rritje nga prerjet e paligjshme, degradimi dhe menaxhimi i dobët. Kudo që shkoj në Kosovë, qoftë kur bëj ecje malore, ngjitem në male apo lëviz me biçikletë, shoh prerje të paligjshme të pyjeve. Qoftë në veri, qoftë në jug, qoftë vetëm pak jashtë Prishtinës. E shoh çdo fundjavë”, ka thënë ai.
Ambasadori Westerlund foli për përvojën suedeze në menaxhimin e qëndrueshëm të pyjeve dhe për rolin e gazetarisë në këtë proces.
“Ju jeni ura lidhëse mes fakteve shkencore dhe publikut. Fjalët tuaja formësojnë të kuptuarit, rrisin ndërgjegjësimin dhe frymëzojnë veprim. Sot, ndërsa jemi mbledhur për të diskutuar mbi gazetarinë e gjelbër, dua të theksoj një mesazh kryesor: pyjet janë më shumë se thjesht pemë. Ato janë themeli i jetës. Mbështesin biodiversitetin, rregullojnë klimën, sigurojnë mjete jetese dhe janë vendimtare në luftën tonë kundër ndryshimeve klimatike.
Suedia ka një kuptim të thellë mbi rëndësinë e pylltarisë së qëndrueshme. Ne kemi zhvilluar një nga modelet më të avancuara në botë për të balancuar rritjen ekonomike me mbrojtjen e mjedisit. Ne zbatojmë ligje të rrepta pyjore, përdorim mjete digjitale të monitorimit dhe kemi politika të fuqishme që sigurojnë qëndrueshmërinë e burimeve pyjore. Ky qasje ka forcuar si ekonominë tonë, ashtu edhe mjedisin tonë. Gazetaria e gjelbër ka luajtur një rol vendimtar në suksesin mjedisor të Suedisë.
Kjo qasje tregon se gazetaria është më shumë se thjesht raportim i lajmeve. Ajo është një forcë e fuqishme për formësimin e së ardhmes. Gazetarët e Kosovës kanë mundësinë të bëjnë të njëjtën gjë, duke nxitur ndryshime pozitive përmes tregimeve të mirinformuara dhe tërheqëse. Ngjarja e sotme ka të bëjë me fuqizimin e gazetarëve me mjetet e duhura”, ka thënë ambasadori Westerlund.
Naser Krasniqi, udhëheqës vendor i Organizatës për Ushqim dhe Bujqësi të Kombeve të Bashkuara –FAO, foli për rëndësinë e mbështetjes që kjo organizatë po i jep gazetarisë së gjelbër.
Ai gjithashtu theksoi se pret që gazetarët e trajnuar të angazhohen më shumë në raportimin investigativ në sektorin e pylltarisë.
“Një prej aktiviteteve që FAO është duke mbështetur është organizimi i trajnimit për gazetarët që profilizohen në sektorin e mjedisit dhe duhet të raportojnë për sfidat e sektorit të pyjeve dhe mjedisit në Kosovë. Tani, në bashkëpunim me BB Green Kosova, po mundohemi të forcojmë gazetarinë e gjelbër në Kosovë, e cila do të ketë ndikim në zhvillimin e sektorit të pyjeve dhe atij të mjedisit në përgjithësi”, ka thënë Krasniqi.
