Sistemi arsimor në Kosovë ka nevojë për përmirësime shumë të mëdha në matematikë, shkencë dhe lexim, kështu u tha të mërkurën në konferencën “Ndikimi i PISA-s në informimin e politikave arsimore në Kosovë”, raporton Ekonomia Online.
Aty u tha se Kosova ka nevojë për përmirësime shumë të mëdha në matematikë, shkencë dhe lexim.
Ministrja e Arsimit, Shkencës, Teknologjisë dhe Inovacionit, Arbërie Nagavci, ka thënë se janë duke u përgatitur më shumë se një vit për testin PISA 2025.
Sipas saj, sipas rezultateve të OECD-së për të gjitha vendet tregojnë se mësimdhënësit kanë dështuar në ofrimin e mësimdhënies adekuate për nxënësit dhe 35 për qind e nxënësve kanë raportuar se mësimdhënësit nuk kanë treguar interes për të mësuar secilin nxënës.
“Rezultate e testit janë vetëm një nga instrumentet e suksesit dhe kjo duhet pasur parasysh për vendet ku sfidat janë të shumat dhe burimet nuk janë gjithmonë të mjaftueshme. Si shtet i ri në perspektivë por edhe me shumë sfidat më gjithë sektorët e jetës, njohim shumë mirë kompleksitetin e arsimit. Proceset madhore kanë sukses vetëm me bashkëpunim të gjithanshëm. Të dhënat e PISA tregojnë se shumë mësimdhënës për fat të keq, po flas në përgjithësi, jo vetëm në Kosovë, por në përgjithësi në rezultate e OECD-së tregojnë se mësimdhënësit kanë dështuar në ofrimin e mësimdhënies adekuate për nxënësit dhe 35 për qind e nxënësve kanë raportuar se mësimdhënësit nuk kanë treguar interes për të mësuarit e secilin nxënës dhe në rastet më të shpeshta ata që nuk arrijnë të marrin mbështetjen e nevojshme të duhur nga mësimdhënësit, dhe janë pikërisht ata që kanë më së shumit nevojë. Kjo mesatare është përafërsisht në të gjitha vendet e OECD-së”, ka thënë ajo.
Fatmir Elezi, Udhëheqës i Qendrës për Standarde dhe Vlerësim në MASHT, ka thënë se PISA 2025 si fushë kryesore ka shkencën leximin dhe matematikën si dhe këtë vit për herë të parë është të mësuarit në botën digjitale.
Ai u shpreh se testi këtë vit do të zhvillohet online.
“Këtë vit për herë të parë do të prezantohen rezultate individuale të çdo shkolle. Në 2025 shkenca është fushë kryesore, ky vit i PISA-s do të ketë një theks të veçantë te shkencat, me një fokus të veçantë në mënyrën se si nxënësit përdorin njohuritë shkencore për të kuptuar dhe adresuar problemet e ndryshimeve klimatike dhe sfidat mjedisore. Po ashtu edhe leximi është një prej fushave që vlerësohet në PISA. Nxënësit do të duhet të analizojnë dhe interpretojnë informacionin nga tekste të ndryshme. PISA do të vazhdojë të vlerësojë aftësitë e nxënësve në përdorimin e matematikës për të zgjidhur probleme nga jeta e përditshme, duke përfshirë gjithashtu problemet që kërkojnë të dhëna dhe analizë numerike. Një fushë e re që do te jetë këtë vit është të mësuarit në botën digjitale. Nxënësit do të përzgjidhen nxënës nga klasa e shtata e më lartë, të lindur në vitin 2009. Në total do të zgjedhjen 7,500 nxënës, për të përfaqësuar vendin minimumi 6,400 nxënës që duhet të marrin pjesë. Janë gjashtë shkolla serbe që janë përzgjedhur”, ka thënë ai.
Andreas Schleicher, Drejtor i OECD-së për Arsim Nismëtar i Programit për Vlerësim Ndërkombëtar të Nxënësve PISA, ka thënë se Kosova ka nevojë për përmirësime shumë të mëdha në matematikë, shkencë dhe lexim.
Ai ka shtuar se kjo është e qartë dhe është një lloj boshllëku në sistemin arsimor në Kosovë.
“Sot, shkrim-leximi nuk është më vetëm një proces i nxjerrjes së njohurive, por një proces i ndërtimit të njohurive. Dhe ky është theksi që vendosim te leximi në PISA. Nuk mjafton thjesht të lexosh një tekst dhe ta kuptosh atë, por duhet të jesh në gjendje të bësh lidhjet e duhura, të vlerësosh saktësinë e tekstit. E njëjta gjë vlen edhe për matematikën. Kur testojmë nxënësit në matematikë, nuk u kërkojmë thjesht të mbajnë mend formula dhe ekuacione dhe t’i zbatojnë ato. Duam që ata të tregojnë se mund të mendojnë si matematikanë, që mund të marrin një problem nga bota reale dhe ta përkthejnë atë në gjuhën e matematikës për ta zgjidhur me mjetet matematikore. Dhe kur marrin rezultatet, duam që ata t’i kuptojnë ato në kontekstin e botës reale”.
“Pse e theksoj këtë këtu? Sepse nuk është shumë pjesë e traditës arsimore në Kosovë, ku arsimi ende bazohet më shumë në mësimin e përmbajtjes sesa në zbatimin e saj. Dhe kjo ka pasoja në testin PISA. Por, kur shikojmë rezultatet në nivelin e OECD-së, pavarësisht rritjes së kërkesave për aftësi, nuk kemi parë shumë ndryshime në aftësitë matematikore. Madje, gjatë katër viteve të fundit, kemi parë një rënie. Kosova ka qenë më e suksesshme në ruajtjen e rezultateve të saj gjatë pandemisë sesa vende të tjera. Por, megjithatë, tendenca nuk është e mirë. Nuk po arrijmë të rrisim njohuritë dhe aftësitë e të rinjve, por po shohim një lloj stagnimi. Ajo që kemi parë në Kosovë është një performancë e qëndrueshme, ashtu siç e shohim në shumicën e vendeve. Dhe kjo shpjegon pozicionin që kanë këto vende në testin përfundimtar. Kosova ka nevojë për përmirësime shumë të mëdha në matematikë, shkencë dhe lexim. Kjo është e qartë, një lloj boshllëku në sistemin arsimor. Por, pavarësisht këtij boshllëku, ia vlen të theksohen shumë nga forcat që sistemi tashmë ka dhe që nuk duhet të humbasin kur sistemi të përmirësohet në lexim, matematikë dhe shkencë”, ka thënë ai.
