Intervistë me autorin: Egzon Luma
Intervistoi: Fatijona Bajraj
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
E.Luma: Unë të shkruarit nuk e shoh si karrierë, nuk e mendoj të bej karrierë në këtë fushë, thjeshtë shkruaj sepse ndonjëherë e ndjej të arsyeshme të shkruaj, shkrimi është diçka që vjen natyrshëm nga brenda, gjithashtu nuk është se e përcaktoj unë ” pse bash poezia” përkundrazi unë lexoj shume pak poezi, por që më vjen natyrshëm të shkruaj përmes rreshtave që ne fund del si poezi.
F.Bajraj: A mendoni që e keni arritur kulmin e karrierës suaj?
E.Luma: E thash më sipër nuk e shoh si karrierë, po edhe po ta shihja ashtu mendoj se njeriu sa rrnon mëson, kështu që nuk besoj se do kishte dikush i cili do jepte një përgjigje konkrete për këtë.
F.Bajraj: A kujtoni ndonjë kohë kur mendoni se keni dështuar në këtë fushë?
E.Luma: Tundimi është pjesë e pandashme e njeriut, një zemër e gjallë ndjen kohë pas kohe tundime ashtu siç ndjen pasiguri dhe frikë, ndodhë që ndonjëherë të ndihemi sikur po dështojmë në çdo hap të jetës që e hedhim, ndonjëherë është mirë të tërhiqemi dhe të mbushemi me energji, por duke mos hequr dorë nga gjërat që i duam.
F.Bajraj: Sa e keni pas të vështirë dhe sfiduese të jeni këtu ku jeni sot?
E.Luma: Nuk është se kam arritur në ndonjë pikë më çështjen e letërsisë, por as nuk është se kam pasur ose kam ndonjë qëllim me letërsinë thjeshtë lexoj vazhdimisht dhe leximi është pjesë e pandashme e imja, por shkruaj kohë pas kohe kur e shoh të arsyeshme se mundem të nxjerr diçka në letër.
F.Bajraj: Me çka merreni jashtë kësaj, keni ndonjë profesion tjetër?
E.Luma: Po merem edhe me gjëra tjera, jam profesionist në sekrorin e gastronomisë, e njoh shumë mirë këtë pjesë, gjithashtu punoj në një kompani gjermane e cila merret me instalimin e energjisë elektrike, jam udhëheqës i një grupi të vogël punëtorësh në atë kompani.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
E.Luma: Po veç se jam në fusha të ndryshme unë besoj se: nëse njeriu merret vetëm me atë se çfarë di të bej, asnjëherë nuk do mund ta kuptoj se çfarë aftësi tjera posedon brenda vetes. Nuk më pëlqejnë kufizimet.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
E.Luma: Tek autorët e ri nuk është se kam hasur në ndonjë që më ka tërhequr vëmendjen ose të më bëj përshtypje në atë se çfarë shkruan. Mendoj se njeriu ose autori duhet të lexoj më shumë se sa të shkruaj, ndërkohe qe shoh se tek ne më shumë shkruajnë se sa lexojnë.
F.Bajraj: Planet e juaja që do t’i realizoni së shpejti?
E.Luma: Kam disa plane por nuk mendoj se janë në interes të përgjithshëm për tu diskutuar, çdo plan që e kam përfshinë jetën time private dhe familjare. (Mendoj të kthehem në Kosovë dhe të zhvilloj diçka në fushat e mia ku unë mundë të laboroj lirshëm)
F.Bajraj: Si e shihni Kosovën pas 10 vitesh në fushën e letërsisë?
E.Luma: Nuk është se kam pritshmëri të mëdha në ngritjen intelektuale tek të rinjtë duke marrë parasysh statistikat e fundit që u nxorën se sa është përqindja e analfabetëve tek ne, dhe duke parë shkurtimisht intervistat që zhvillohen nëpër rrugë nga pseudo gazetarët, pritshmëritë janë shumë të vogla. Por, është mirë dhe asnjëherë nuk është vonë që të punohet në vetëdijesimin e shoqërisë.
