Arsenal ka bërë një hap të madh drejt çerekfinales së Champions League, pasi ka triumfuar me rezultat të thellë 7-1 ndaj PSV Eindhoven në Holandë. Ndërsa Real Madrid ka mposhtur me rezultat të ngushtë Atletico Madrid e Borussia Dortmund dhe Lille janë ndarë baras.
Skuadra e drejtuar nga Mikel Arteta e ka dominuar plotësisht sfidën, duke e bërë ndeshjen e kthimit një formalitet.
Golat për londinezët janë shënuar nga Timber (18’), Nwaneri (21’), Merino (31’), Odegaard (47’, 73’), Trossard (48’) dhe Calafiori (85’). Ndërsa holandezët kanë arritur të shënojnë vetëm një herë me anë të Noa Lang (43’).
Në një tjetër përballje të madhe, Real Madrid ka marrë një fitore të ngushtë 2-1 ndaj Atletico Madrid në “Santiago Bernabeu”.
Rodrigo e ka hapur serinë e golave për “Los Blancos” që në minutën e katërt, por Alvarez ka barazuar për skuadrën e Diego Simeone në pjesën e parë. Megjithatë, Real Madrid e ka siguruar fitoren me golin e Brahim Diaz në fillimin e pjesës së dytë (52’).
Ndërkohë, dueli mes Borussia Dortmund dhe Lille ka përfunduar pa fitues, 1-1, duke lënë gjithçka të hapur për ndeshjen e kthimit. Gjermanët kanë kaluar në epërsi në pjesën e parë me golin e Adeyemit, ndërsa francezët kanë barazuar në pjesën e dytë me golin e Haraldsson.
Champions League vazhdon të mërkurën me katër duele të tjera.
