Intervistë me poeten: Blertë Tmava Veselaj
Intervistoi: Fatijona Bajraj
Blerta Tmava Veselaj ka lindur në Mitrovicë. Është rritur në fshatin Llugaxhi të komunës së Lipjanit. Shkollën fillore e kreu në SHFMU ‘ Hasan Prishtina’ në Llugaxhi. Shkollën e mesme në Gjimnazin ‘Ulpiana’ të Lipjanit. Studimet Bachelor dhe Master në fushën e Psikologjisë në Prishtinë.
Veprat e saj letrare janë:
Lulëkuqja e Fshatit (piezi)-2004,
Luftoj me Vargje (poezi)-2010,
Fjalë Shpirti ( poezi)- 2022,
Shiu në xhamin e dashurisë (poezi)-2023
Antologji e poezisë ” Fjalë me Krahë” – Suedi – 2023
Antologji e poezisë ‘ Zëri I Mërgimtarit ” – Itali – 2023
Po që se mendon si unë (poezi) 2024
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
B.Tmava Veselaj: Shkëndijat e para që unë të futem në ujërat e letërsisë pikërisht shkrimeve janë nga mosha 8- 9 vjeçare si nxënëse e klasës së tretë të shkollës fillore, ku dhe mori jetë poezia ime e parë dhe nga ajo poezi u rrit dashuria ime për poezin dhe shkrime të tjera letrare. Unë nuk e zgjodha poezinë, po mendoj se ajo më gjeti mua.
F.Bajraj: A mendoni që e keni arritur kulmin e karrierës suaj?
B.Tmava Veselaj: Jo nuk besoj që kam arritur ato që synoj ndonjëherë mendoj se ende jam në fillimet e mia nga që ajo çfarë besoj se mund të arrij do ende shumë punë por jam e kënaqur me këtë ku jam sot.
F.Bajraj: A kujtoni ndonjë kohë kur mendoni se keni dështuar në këtë fushë?
B.Tmava Veselaj: Dështim nuk do të thoja por që u largova nga shkrime kisha një periudhë prej 12 vitesh, këtë nuk e bëra qëllimisht në fillim por që më vonë po e vërej vetën shumë të largët me shkrimet dhe që në atë kohë nuk e mendoja që do të kthehesha sërish në këtë rrugëtim.
F.Bajraj: Sa e keni pas të vështirë dhe sfiduese të jeni këtu ku jeni sot?
B.Tmava Veselaj: Çdo rrugëtim i ka vështirësitë e veta, unë i doja shkrimet, i ndjeja ishin bota ime e brendshme të cilën doja ta nxiirrja jashtë dhe shkrimet si të tilla nuk më bënë asnjëherë të ndjehem në vështirësi por që sfidat e ndryshme jetësore shpeshherë vështirësuan lidhjen time me shkrimet por që nuk i braktisa krejtësisht asnjëherë.
F.Bajraj: Me çka merreni jashtë kësaj, keni ndonjë profesion tjetër?
B.Tmava Veselaj: Poezia është pjesë e imja asnjëherë profesion, si profesion timin zgjodha të studioja psikologjinë por që nuk arrita deri më tani ta ushtrojë si profesion të plotë. E dua dhe shpresoj shumë të jap kontributin tim sa më shpejt në këtë drejtim.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
B.Tmava Veselaj: Deri më tani kam pasur dëshira të cilat kanë mbetur thjesht dëshira por në kohën e fundit e shoh që kam dëshirë të eksploroj në fusha të ndryshme, nuk jam e sigurt se mund të filloj diçka shumë ndryshe se shpejti por as nuk e mohoj.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
B.Tmava Veselaj: Unë nuk jam profesioniste e letërsisë por nga këndvështrimi im shohë arritje po në të njëjtën kohë mangësi, mendoj që duhet shumë kohë dhe punë për të arritur një stabilitet letrar.
F.Bajraj: Planet e juaja që do t’i realizoni së shpejti?
B.Tmava Veselaj: Nuk i planifikoj shumë gjërat e mia për shumë arsye po që po punoj gradualisht për përfundimin e disa Librave të mia poashtu mundohem të jem sa më aktive në aktivitetet letrare dhe ato shkencore të fushës time
F.Bajraj: Si e shihni Kosovën pas 10 vitesh në fushën e letërsisë?
B.Tmavaj Veselaj: 10 vite janë shumë, shpresoj të kemi një nivel shumë të ngritur letrar përgjatë këtyre viteve por fillimisht duhet shumë punë por edhe planifikim I mirë për të ecur hapave të sigurt.
