Mosformimi i Qeverisë dhe mungesa e fondeve nga Administrata amerikane mund të ndikojnë në vonesat e implementimit të strategjisë për energji. Kështu u tha të enjten në konferencën për media nga Instituti i Prishtinës për Studime Politike (PIPS), raporton Ekonomia Online.
Ndër shqetësimet tjera sipas tyre është edhe burokracia dhe procedurat e ndërlikuara të prokurimit, të cilat kanë shtyrë afatet e zbatimit të projekteve.
“Diçka që duhet marrë parasysh për periudhën e ardhshme është që jo formimi i Mungesa e Qeverisë mundet me ndikua akoma më shumë në vonesat e implementimit të kësaj strategjie dhe gjithashtu mungesa e fondeve nga Administrata amerikane mundet me dërgu deri në stagnimin e implementimit të strategjisë”, tha Diella Muqolli nga PIPS.
Ajo tha se raporti tregon se shumë masa të planifikuara për vitet 2023-2024 nuk janë përmbushur brenda afateve kohore.
“Burokracia dhe procedurat e ndërlikuara të prokurimit që kanë shtyrë afatet e zbatimit të projekteve, mungesa e financimeve të shpejta nga burime të jashtme dhe vonesat në miratimin e fondeve si dhe koordinimi i dobët ndërinstitucional, duke shkaktuar vonesa në miratimin e dokumenteve dhe zbatimin e projekteve konkrete”, u shpreh ajo, teksa tregoi edhe për hapat e Nevojshëm për Përshpejtimin e Progresit.
“Për të përshpejtuar zbatimin e Strategjisë së Energjisë, duhet të ndërmarrim hapa konkretë në disa fusha kyçe: fuqizimi i koordinimit ndërmjet institucioneve – Është e domosdoshme që ministritë dhe agjencitë përkatëse të bashkëpunojnë më ngushtë për të shmangur vonesat burokratike. Sigurimi i financimeve të qëndrueshme dhe përshpejtimi i prokurimeve – Nevojitet një mekanizëm më efikas për shpërndarjen e fondeve dhe eliminimin e pengesave procedurale. Përshpejtimi i miratimit të akteve nënligjore – Një kornizë e qartë ligjore do të ndihmojë në tërheqjen e investitorëve dhe përshpejtimin e projekteve të energjisë së ripërtëritshme. Rritja e ndërgjegjësimit dhe përfshirjes së sektorit privat – Bizneset duhet të kenë më shumë mundësi për të investuar në zgjidhje të qëndrueshme energjetike”, u shpreh ajo.
Ajo tregoi edhe gjetjet kryesore të Raportit të Tretë të Monitorimit të Strategjisë së Energjisë së Republikës së Kosovës 2022-2031 për periudhën e vitit 2024. Ky raport sipas saj ofron një vlerësim të progresit të bërë në sektorin e energjisë dhe identifikon sfidat që ende pengojnë zbatimin e plotë të strategjisë.
Strategjia ka përcaktuar 32 masa, të cilat janë të ndara në tri fusha kryesore:
- Rritja e fleksibilitetit të sistemit
- Modernizimi i rrjetit dhe reduktimi i humbjeve
- Rehabilitimi i kapaciteteve ekzistuese të prodhimit të energjisë elektrike
Në kuadër të këtyre 32 masave, janë identifikuar gjithsej 83 veprime. Sa i përket përmbushjes së këtyre veprimeve, afër 13 për qind të masave janë plotësuar plotësisht. Mbi 72 për qind e masave janë pjesërisht të plotësuara, ndërsa 16 për qind e tyre mbeten të paplotësuara.
